កង្វះបុគ្គលិកនៅរដ្ឋបាលក្រុង​ស្រុក៖ សម្ដេចធិបតី ឱ្យផ្ទេរចេញពីមន្ទីរក្រសួងស្ថាប័ន ក្រោមរូបភាពស្ម័គ្រចិត្ត

មួយរយៈចុងក្រោយរាជរដ្ឋាភិបាលរឹតត្បិតការជ្រើសរើសមន្ត្រីជាទូទៅ លើកលែង​តែមន្ត្រីសុខាភិបាល មន្ត្រីអប់រំ ដូចជាគ្រូបង្រៀន និងមន្ត្រីកសិកម្ម។ ការណ៍នេះ បណ្ដាលឱ្យអភិបាលស្រុកកំពុងត្របែក ខេត្តព្រៃវែង លោក យ៉ាវ សានិន ត្អូញត្អែនៅចំពោះមុខសម្ដេចធិបតី នាយករដ្ឋមន្ត្រីថា កំពុងខ្វះខាតចំនួនបុគ្គលិក និងខ្វះបុគ្គលិកដែលមានជំនាញវិជ្ជាជីវៈជាក់លាក់។

ដើម្បីពង្រឹងស្ថាប័នសាធារណៈនៅគ្រប់ថ្នាក់ ឬរដ្ឋាភិបាលមានតម្រូវការចាំបាច់នៅក្នុងការពិនិត្យ នឹងរៀបចំ ក្របខណ្ឌបុគ្គលិក ដែលមានសមត្ថភាព ជំនាញវិជ្ជាជីវៈ ស្របតាមរចនាសម្ព័ន្ធមុខងារក្រសួងស្ថាប័ន និងរដ្ឋបាលថ្នាក់ក្រោមជាតិ និងដោះស្រាយបញ្ហាខ្វះបុគ្គលិកជំនាញជាក់លាក់​បម្រើការងារ នៅរដ្ឋបាលក្រុងស្រុក សម្ដេចធិបតី ហ៊ុន ម៉ាណែត ឱ្យក្រសួងមុខងារសាធារណៈ ក្រសួងមហាផ្ទៃ ក្រសួងស្ថាប័នពាក់ព័ន្ធ ក្រោមការសម្របសម្រួលរបស់គ ជ អ ប រៀបចំគោលការណ៍ នឹងនីតិវិធី និងគោលការណ៍ណែនាំ និងគាំទ្រដល់រដ្ឋបាលក្រុងស្រុក ក្នុងការវិភាគ និងកំណត់ឱ្យបានច្បាស់លាស់ នូវចំនួនមុខតំណែងវិជ្ជាជីវៈដែលត្រូវការពិតប្រាកដសម្រាប់ការអនុវត្តនៅតាមរដ្ឋបាលក្រុងស្រុកនិមួយៗ ដែលត្រូវរៀបចំផែនការស្ដីអំពីតម្រូវការបុគ្គលិករៀនចប់ច្បាស់លាស់ ដើម្បីរៀបចំស្នើសុំពិនិត្យសម្រេចពីរដ្ឋាភិបាលតាមនីតិវិធីបទដ្ឋានគតិយុត្តជាធរមាន។

ផ្អែកលើផែនការតម្រូវការបុគ្គលិកនេះ សម្ដេចធិបតី ហ៊ុន ម៉ាណែត នៅក្នុងវេទិការដ្ឋាភិបាល និងរដ្ឋបាលថ្នាក់ក្រោមជាតិ ផ្ដល់វិធានការចំនួនពីរដល់ ក្រសួងមុខងារសាធារណៈ ក្រសួងមហាផ្ទៃ និងក្រសួងស្ថាប័នពាក់ព័ន្ធ ត្រូវរៀបចំគោលការណ៍ និងនីតិវិធីអនុវត្តន៍វិធានការចាំបាច់ពីរនៅក្នុងការគិតគូរ ដូចជា វិធានការទី១ គឺសិក្សាលទ្ធភាពផ្ដល់គោលនយោបាយលើកទឹកចិត្ត និងផ្ដល់ឱកាសតាមការស្ម័គ្រចិត្តក្នុងការផ្ទេរបុគ្គលិកដែលមានជំនាញវិជ្ជាជីវៈពីមន្ទីរក្រសួងស្ថាប័នឱ្យទៅនៅបម្រើការតាមរដ្ឋបាលក្រុងស្រុក បានន័យថាពីថ្នាក់ជាតិទៅ ក្រោមជាតិ ក្នុងករណីដែលមាន។

ចំណែកវិធានការទី២ គឺផ្ដល់ការណែនាំដល់ការគាំទ្រដល់រដ្ឋបាលក្រុងស្រុក ក្នុងការជ្រើសរើសបុគ្គលិកផ្អែកលើកិច្ចព្រមព្រៀង ដើម្បីបំពេញមុខតំណែងវិជ្ជាជីវៈ ដែលត្រូវការចាំបាច់ឈលើគោលការណ៍គុណាធិបតេយ្យ តម្លាភាព ត្រឹមត្រូវ និងយុត្តិធម៌ និងគោលការណ៍រើសឱ្យចំ បំពេញឱ្យត្រូវ រក្សាឱ្យនៅ កិច្ចការងារនេះ។

ឆ្លើយតបនឹងសំណើផ្ដល់ថវិកាឱ្យបានច្រើនទៅកាន់មូលដ្ឋាន សម្ដេចធិបតី នាយករដ្ឋមន្ត្រី អះអាងថា កន្លងមក រដ្ឋាភិបាលកម្ពុជា បានផ្ដល់ថវិកាទៅកាន់មូលដ្ឋានជាជំហានៗ ប៉ុន្តែការផ្ដល់ថវិកាច្រើនទៅកាន់មូលដ្ឋានគឺមិនគ្រប់គ្រាន់ឡើយ ដើម្បីដោះស្រាយបញ្ហាខ្វះបុគ្គលិក។  តាមសម្ដេចធិបតី ភាគីពាក់ព័ន្ធត្រូវធ្វើយ៉ាងរិះរកប្រសិទ្ធភាពគ្រប់គ្រងមន្ត្រីឱ្យបានត្រឹមត្រូវ  ពីព្រោះថាបើរដ្ឋចាយថវិកាច្រើនទៅលើបន្ទុកបុគ្គលិក នោះនឹងត្រូវដកថវិកាពីគម្រោងអភិវឌ្ឍន៍ផ្សេងៗ៕