ពលករខ្មែរម្នាក់ទៀតត្រូវបានបញ្ជាក់ថាស្លាប់ក្នុងហេតុការណ៍រញ្ជួយដីនៅថៃ

ពលករខ្មែរម្នាក់ទៀតឈ្មោះ ផល្លា រតនា មានអាយុ២៤ឆ្នាំត្រូវបានបញ្ជាក់ថា បានទទួលមរណភាពក្នុងហេតុការណ៍គ្រោះរញ្ជួយដីបាក់អាគារនៅប្រទេសថៃកាលពីចុងខែមីនាកន្លងទៅ។ ការបញ្ជាក់នេះគឺក្រោយពីទទួលបានលទ្ធផលនៃការធ្វើកោសល្យវិច័យ DNA ពីមន្ទីរពេទ្យនគរបាលថៃ។

ក្នុងសេចក្ដីជូនដំណឹងចុះថ្ងៃទី១៧ ខែមេសា ឆ្នាំ២០២៥ ក្រសួងការងារកម្ពុជាឱ្យដឹងថាពេលនេះក្រសួង ស្ថានឯកអគ្គរាជទូត និងអនុព័ន្ធការងារកម្ពជានៅប្រទេសបានទទួលបន្ឌុកចំណាយ​លើការរៀបចំបូជាសព និងបំពេញឯកសារនានាស្របតាមនីតិវិធីរបស់ប្រទេសថៃ ព្រមទាំងបន្តតាមដានចំពោះសំណងនានា ដែលគ្រួសារនៃសពត្រូវទទួលបានពីភាគីថៃផងដែរ។

លោក ផល្លា រតនា គឺពលរដ្ឋខ្មែរទី២ហើយដែលទទួលមរណភាពក្នុងហេតុការណ៍គ្រោះរញ្ជួយដីបាក់អាគារដែលកំពុងសាងសង់មួយកន្លែងនៅសង្កាត់ចាក់តុចាក់ ក្នុងទីក្រុងបាងកក ប្រទេសថៃ បន្ទាប់ពីលោកមាស សាវ៉ាង ភេទប្រុស អាយុ ២៣ឆ្នាំ ដែលត្រូវបានរកឃើញថាទទួលមរណភាពកាលពីថ្ងៃទី៣១ ខែមីនា៕

អត្ថបទដោយ ហ៊ុន សិរីវឌ្ឍន៍