នាយករដ្ឋមន្ត្រីបញ្ជាក់ចំពោះ​មុខប្រធានសមាគមថ្នាំជក់ថា​មិន​ស្វាគមន៍ការវិនិយោគលើបារីអេឡិត្រូនិច

នាយករដ្ឋមន្ត្រី សម្ដេចធិបតី ហ៊ុន ម៉ាណែត បាន​បញ្ជាក់ជា​ថ្មី និង​ចំពោះ​មុខ​ប្រធាន​សមាគម​ឧស្សាហកម្ម​ថ្នាំ​ជក់(ATIC) ​ថាប្រទេស​កម្ពុជាមិន​ស្វាគមន៍​ការ​វិនិយោគ​លើ​បារី​អេឡិចត្រូនិចនោះទេ។ ការ​បញ្ជាក់​នេះ​ធ្វើ​ឡើង​ក្នុ​ង​ពេលសម្ដេច​ទទួល​ជួប​ពិភាក្សា​ការងារ​ជាមួយ​ប្រធាន ATIC ​លោក Barros Figueira Miguel នៅព្រឹកថ្ងៃទី​១៣ ខែ​ឧសភា ឆ្នាំ២០២៥នេះ នៅវិមាន​សន្ដិភាព ក្នុង​រាជធានីភ្នំពេញ។

ក្នុង​ជំនួប​នោះ​សម្ដេច​ធិបតី ហ៊ុន ម៉ាណែត បានលើក​ឡើង​ថាសុខភាពពលរដ្ឋ​គឺ​ជារឿង​សំខាន់ ហើយ​រដ្ឋ​ក៏​កំពុងមាន​វិធាន​ក្នុងការទប់ស្កាត់ការនាំចូលផលិតផលថ្នាំជក់ និងបារីខុសច្បាប់ផងដែរ។ សម្ដេច​បន្ថែមថាបច្ចុប្បន្ន ក្រសួងស្ថាប័នពាក់ព័ន្ធកម្ពុជាកំពុងពិនិត្យយន្តការនានា ដើម្បីធានានូវតុល្យភាពរវាងការដោះស្រាយបញ្ហាប្រឈមរបស់វិនិយោគិន និងការលើកកម្ពស់សុខភាពសាធារណៈជូនប្រជាពលរដ្ឋ។

សម្ដេចបានគូសបញ្ជាក់សាជាថ្មីថា​ រាជរដ្ឋាភិបាលកម្ពុជានឹងមិនអនុញ្ញាតឱ្យមានការវិនិយោគលេីការផលិតបារីអេឡិចត្រូនិក (e-cigarettes) នៅកម្ពុជានោះទេ។

ប្រធាន ATIC លោក Barros Figueira Miguel បាន​ជម្រាបសម្ដេច​ធិបតីថាលោកគាំទ្រនូវរាល់គំនិតផ្ដួចផ្ដើមដែលបានដាក់ចេញដោយរាជរដ្ឋាភិបាលកម្ពុជា និងបានបង្ហាញបំណងសហការជាមួយក្រសួងស្ថាប័នពាក់ព័ន្ធកម្ពុជា ដើម្បីលើកកម្ពស់ការយល់ដឹងអំពីផលិតផលថ្នាំជក់ និងបារី ដល់ប្រជាពលរដ្ឋ។ លោក​បន្ថែមថាក្នុងរយៈពេលកន្លងមក ATIC បានចូលរួមចំណែកបង្កើតការងារក្នុងស្រុកបានជាង ៤៥០០ កន្លែង និង រួមចំណែកដល់ការអភិវឌ្ឍសង្គម-សេដ្ឋកិច្ចនៅកម្ពុជា។

កាលពី​ថ្ងៃទី​៥ ខែឧសភា ឆ្នាំ២០២៥ កន្លងទៅ​ក្នុង​ពិធី​ប្រកាស​ដាក់​ឱ្យ​អនុវត្តជា​ផ្លូវ​ការ «ផែន​ការ​ជាតិប្រយុទ្ធនឹង​ជំងឺ​មហារីក២០២៥-២០៣០ សម្ដេចធិបតី ហ៊ុន ម៉ាណែត បាន​ថ្លែងថាសម្ដេច​មិន​ស្វាគមន៍សំណើរ​ណា​ក្នុង​ការ​បើករោងចក្រផលិត​បារី​អេឡិចត្រូនិកនៅ​កម្ពុជា​នោះទេ ទោះ​ផលិត​ដើម្បី​នាំ​ចេញ​ក៏​ដោយ​។ ក្រៅពី​នេះសម្ដេច​ក៏​បញ្ជា​ឱ្យ​អាជ្ញាធរត្រួតពិនិត្យលើសិស្សសាលាពី​ការ​ប្រើប្រាស់​អេឡិចត្រូនិកនេះផងដែរ៕

អត្ថបទដោយ ហ៊ុន សិរីវឌ្ឍន៍