អតីតសិស្សនិទ្ទេស A ចែករំលែកគន្លឹះសំខាន់ ៣ចំណុច ដើម្បីត្រៀមខ្លួនយកអាហារូបករណ៍សិក្សានៅអាមេរិក

កញ្ញា ថាវ គឹមនី អតីតសិស្សនិទ្ទេស A ឆ្នាំ២០២២ មកពីខេត្តបន្ទាយមានជ័យ បច្ចុប្បន្នជានិស្សិតឆ្នាំទី៤ ជំនាញវិស្វកម្មជីវសាស្ត្រ នៅសាកលវិទ្យាល័យភូមិន្ទភ្នំពេញ ព្រមទាំងទទួលបានអាហារូបករណ៍ចំនួន២ ទៅសិក្សានៅសហរដ្ឋអាមេរិក បានចែករំលែកពីគន្លឹះសំខាន់ៗចំនួន៣ ចំណុច ដល់និស្សិតឯទៀតក្នុងការត្រៀមខ្លួនឱ្យបានរួចរាល់សម្រាប់ទទួលបានអាហារូបករណ៍ទៅក្រៅប្រទេស។

និស្សិតស្រី ថាវ គឹមនី បានប្រាប់មក កម្ពុជាថ្មី ថា ខ្លួនទទួលបានអាហារូបករណ៍សិក្សានៅសហរដ្ឋអាមេរិកចំនួន២។ ទី១ The 2025 YSEALI Academic Fellows Program ដែលជាកម្មវិធីផ្លាស់ប្ដូរការសិក្សា Fully Funded ដោយ U.S department of State មានរយៈពេលចំនួន ៥សប្ដាហ៍ ហើយ គឹមនី បានទៅរដ្ឋ Hawai’i, New Mexico, និង រាជធានី Washington D.C សិក្សាទៅលើជំនាញ ធនធានធម្មជាតិ (Theme: Natural Resources)។ កម្មវិធីទី២  គឺ Harpswell U.S. Scholarship 2025-2026 ដែលជា Fully Funded Fellowship ទៅសិក្សានៅសហរដ្ឋអាមេរិកចំនួន ១ឆ្នាំនៅសកលវិទ្យាល័យ Christian Brothers University នៅទីក្រុង Memphis រដ្ឋ Tennessee រៀបចំដោយមូលនិធិ Harpswell លើជំនាញ សុខភាពសាធារណៈ (Public Health)។ កញ្ញាបញ្ជាក់ថា អាហារូបករណ៍ទី១ ខ្លួនទើបតែបញ្ចប់ការសិក្សាកាលពីពេលថ្មីៗនេះ ដោយឡែក សម្រាប់អាហារូបករណ៍ទី២ នឹងចាប់ផ្តើមនៅខែសីហា ឆ្នាំ២០២៥ ខាងមុខ។

សម្រាប់ការត្រៀមខ្លួនបែបណា ដើម្បីទទួលបានអាហារូបករណ៍នោះ គឹមនី បានចែករំលែកចំនួន៣ចំណុច ទី១ ការស្គាល់ពីអាហារូបករណ៍ ទី២ ស្គាល់ពីខ្លួនឯង និងទី៣ ការត្រៀមខ្លួន។ គឹមនី ថា មុននឹងនិស្សិតសម្រេចចិត្តដាក់អាហារូបករណ៍អ្វីមួយ គឺត្រូវធ្វើការស្រាវជ្រាវលើអាហារូបករណ៍នោះឱ្យបានច្រើនអំពីអាហារូបករណ៍ និងលក្ខខណ្ឌនានាដែលត្រូវការ។ បន្ទាប់ពីសិក្សាស្វែងយល់ពីអាហារូបករណ៍ហើយ និស្សិតត្រូវមកមើលពីសមត្ថភាពរបស់ខ្លួន តើខ្លួនមានអ្វីតាមតម្រូវការរបស់អាហារូបករណ៍ដែរទេ? បន្តមកទៀត អ្នកសិក្សាក៏ត្រូវមានការត្រៀមខ្លួនរួចជាស្រេចក្នុងការចូលរួមកិច្ចការសង្គម ការងារស្ម័គ្រ ចូលរួមវគ្គបណ្តុះបណ្តាល និងសិក្ខាសាលាឱ្យបានច្រើន ដើម្បីបង្ហាញថា ខ្លួនបានចូលរយមការងារសង្គម ឬភាពជាអ្នកដឹកនាំក្នុងខ្លួនជាដើម។

និស្សិត វិស្វកម្មជីវសាស្ត្ររូបនេះ បានលើកទឹកចិត្ត ដល់និស្សិត និងអ្នកដែលចង់ដាក់អាហារូបករណ៍ទៅក្រៅប្រទេសទាំងអស់មានគំនិតវិជ្ជមានមួយក្នុងខ្លួន គឺគ្មានអ្វីដែលមិនអាចទៅរួចនោះទេ។ ចំណុចនេះ គីមនី ចង់ឱ្យនិស្សិតគ្រប់រូបតាំងចិត្តខិតខំដាក់ពាក្យយកអាហារូបករណ៍ដែលខ្លួនចង់បាន កុំចុះចាញ់ ដើម្បីអភិវឌ្ឍន៍ខ្លួន និងប្រទេសជាតិ។

កញ្ញា គឹមនី និយាយថា៖ “អ៊ីចឹង អត់មានអីដែលមិនអាចទៅរួចទេ។ Be positive តាំងចិត្ត ព្យាយាម ហើយធ្វើវា។ ដាក់ពាក្យទៅ ជាប់ មិនជាប់ គឺជាការខិតខំរបស់យើង បើសិនជាមិនជាប់ យើងត្រូវខិតខំបន្តទៀត”។

បើនិយាយពីបទពិសោធសិក្សានៅសហរដ្ឋអាមេរិកវិញ និស្សិតស្រី ថាវ គឹមនី បន្ថែមថា រយ​ៈពេល ៥សប្តាហ៍ ផ្លាស់ប្តូរការសិក្សានៅអាមេរិក ខ្លួនរៀនសូត្របានច្រើនមែនទែន ដូចជាបច្ចេកទេសរៀន និងពិភាក្សាគ្នារបស់ប្រទេសមហាអំណាចមួយនេះ ការចេះរស់នៅឯករាជ្យដោយខ្លួនឯង ការចែករំលែកភាសា វប្បធម៌ ទំនៀមទម្លាប់រវាងគ្នា និងជនជាតិដែលមកពីបណ្តាប្រទេសផ្សេងទៀត រួមជាមួយនឹងកិច្ចការនានាដែលធ្វើរួមគ្នាក្នុងនាមជានិស្សិតរស់នៅក្នុងអន្តេវាសិកដ្ឋានអំឡុងពេលសិក្សានៅទីនោះ បានធ្វើឱ្យនិស្សិតកម្ពុជារូបនេះ មានមោទនភាពជាខ្លាំង ព្រមទាំងទទួលបានចំណេះដឹង និងបទពិសោធថ្មី៕