ព័ត៌មានជាតិ

លោក នេត្រ ភក្ត្រា លើកទឹកចិត្តម្ចាស់ស្ថានីយទូរទស្សន៍ក្នុងស្រុកទាំងអស់ បន្តផលិតមាតិកាកម្សាន្តសប្បាយ និងរឿងខ្មែរ មានគុណភាព ឲ្យបានច្រើន

បានផុស

៤៩ វិនាទី មុន

នៅ

ថ្ងៃសៅរ៍ ១៤ មិថុនា ២០២៥

ដោយ

លោក នេត្រ ភក្ត្រា បានលើកទឹកចិត្តដល់ម្ចាស់ស្ថានីយទូរទស្សន៍ក្នុងស្រុកទាំងអស់ បន្តផលិតមាតិកាកម្សាន្តសប្បាយ រឿងខ្មែរ ឲ្យបានច្រើន និងមានគុណភាព ដើម្បីលើកស្ទួយវប្បធម៌ជាតិ។ លោកថា រឿងខ្មែរ មិនត្រឹមតែជាមធ្យោបាយកម្សាន្តប៉ុណ្ណោះទេ ប៉ុន្តែជាឧបករណ៍សំខាន់សម្រាប់ថែរក្សា និងពង្រឹងវប្បធម៌ អរិយធម៌ ភាសា និងអត្តសញ្ញាណជាតិ បានកាន់តែរឹងមាំបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកទឹកចិត្តឲ្យមានការផលិតរឿងខ្មែរ និងមាតិការបស់ជាតិសំខាន់ៗ នេះ ធ្វើឡើងក្នុងឱកាស លោក នេត្រ ភក្ត្រា រដ្ឋមន្ត្រីក្រសួងព័ត៌មាន អញ្ជើញជាអធិបតី នៃកិច្ចប្រជុំជាមួយអ្នកគ្រប់គ្រង និងម្ចាស់ស្ថានីយទូរទស្សន៍ទាំងអស់ នៅកម្ពុជា ស្ដីពីការបញ្ឈប់ការចាក់ផ្សាយខ្សែភាពយន្ត និងវីដេអូថៃគ្រប់ប្រភេទនៅលើកញ្ចក់ទូរទស្សន៍របស់ខ្លួន។

កិច្ចប្រជុំកាលពីរសៀលថ្ងៃទី ១៣ ខែមិថុនា ឆ្នាំ ២០២៥ ម្សិលមិញ ធ្វើឡើងបន្ទាប់ពី ក្រសួងព័ត៌មាន បានចេញលិខិតប្រាប់ដល់ម្ចាស់ស្ថានីយទូរទស្សន៍ទាំងអស់នៅកម្ពុជា បញ្ឈប់ការចាក់ផ្សាយខ្សែភាពយន្តថៃគ្រប់ប្រភេទនៅលើកញ្ចក់ទូរទស្សន៍របស់ខ្លួន ចាប់ពីម៉ោង ១២ យប់ ថ្ងៃទី ១២ ខែមិថុនា ឆ្នាំ ២០២៥ តទៅ ហើយម្ចាស់ស្ថានីយទូរទស្សន៍ទាំងអស់ ត្រូវចូលរួមអនុវត្តដោយស្មារតីទទួលខុសត្រូវខ្ពស់។

ជាមួយគ្នានេះដែរ ក្រសួងវប្បធម៌ និងវិចិត្រសិល្បៈ ក៏បានចេញលិខិតជូនដំណឹងដល់គ្រប់ក្រុមហ៊ុនចែកចាយភាពយន្ត និងរោងភាពយន្តទាំងអស់ ក្នុងព្រះរាជាណាចក្រកម្ពុជា បញ្ឈប់ការនាំចូល និងបញ្ឈប់ការចាក់បញ្ចាំងភាពយន្តថៃនៅតាមរោងភាពយន្តរបស់ខ្លួន និងនៅតាមទីតាំងផ្សេងទៀត ជាកំហិត ចាប់ពីម៉ោង ១២ ថ្ងៃត្រង់ ថ្ងៃទី ១៣ ខែមិថុនា ឆ្នាំ ២០២៥ តទៅ។

ទន្ទឹមជាមួយគ្នានេះ សហព័ន្ធកីឡាប្រដាល់គុណខ្មែរ ក៏បានប្រាប់ទៅម្ចាស់ស្ថានីយទូរទស្សន៍ និងក្រុមហ៊ុនដៃគូអភិវឌ្ឍន៍ទាំងអស់ ឲ្យបញ្ឈប់ការចាប់គូរាល់កីឡាករ-កីឡាការិនីជនជាតិថៃ នៅគ្រប់ស្ថានីយទូរទស្សន៍ និង សង្វៀននានា ក្រោមការគ្រប់គ្រងរបស់សហព័ន្ធកីឡាប្រដាល់គុនខ្មែរ ចាប់ពីថ្ងៃទី ១៣ ខែមិថុនា តទៅផងដែរ។

លោក នេត្រ ភក្ត្រា បានបញ្ជាក់ថា ការចាក់ផ្សាយរឿងភាពយន្តរបស់ថៃ ក៏ត្រូវបានហាមឃាត់នៅលើប្រព័ន្ធអនឡាញគ្រប់ទម្រង់ និងស្ថានីយទូរទស្សន៍ថៃដែលមានចាក់រឿងភាពយន្តថៃនៅក្នុងបណ្ដាញទូរទស្សន៍ខ្សែកាប និងតាមផ្កាយរណប ក៏ត្រូវបិទផងដែរ។

លោករដ្ឋមន្ត្រី បញ្ជាក់ទៀតថា រាល់វិធានការដែលរាជរដ្ឋាភិបាលកម្ពុជាបានដាក់ចេញនេះ គឺធ្វើឡើង ដើម្បីផ្សព្វផ្សាយពីវិធានការចំពោះមុខ នៃការគំរាមកំហែងរបស់ថៃ ក្នុងនោះមានការដាក់ចុះនូវវិធានការទាក់ទងនឹងវិស័យព័ត៌មាន និងសោតទស្សន៍ ឲ្យបានរឹងមាំ មានប្រសិទ្ធភាពខ្ពស់។ ដូច្នេះ ម្ចាស់ស្ថានីយទូរទស្សន៍ទាំងអស់ ត្រូវចូលរួមអនុវត្តនូវវិធានការទាំងឡាយរបស់រាជរដ្ឋាភិបាល ដែលជាការបង្ហាញពីសាមគ្គីភាពជាតិរឹងមាំ ហើយក៏បង្ហាញថា ប្រជាជនកម្ពុជា មិនទៅរំលោភបំពានគេនោះទេ ប៉ុន្តែបើគេរំលោភបំពានមកលើយើង គឺត្រូវប្រើសិទ្ធិក្នុងការពារ។

នាឱកាស នៃកិច្ចប្រជុំនេះដែរ តំណាងម្ចាស់ស្ថានីយទូរទស្សន៍ទាំងអស់ បានបង្ហាញនូវការគាំទ្រ និងចូលរួមអនុវត្តឲ្យបានម៉ឺងម៉ាត់ចំពោះវិធានការទាំងឡាយដែលរាជរដ្ឋាភិបាលបានដាក់ចេញ ពិសេសគោរពតាមការណែនាំរបស់ក្រសួងព័ត៌មាន បញ្ឈប់ការចាក់ផ្សាយខ្សែភាពយន្តថៃគ្រប់ប្រភេទនៅលើកញ្ចក់ទូរទស្សន៍របស់ខ្លួន ចាប់ពីពេលនេះតទៅ៕