នៅផ្សារពូភុយ​​កណ្តាល​ក្រុង​បាតដំបង មានបន្លែ​​ក្នុងស្រុកគ្រប់​មុខ​លក់មិនខ្វះ ក្រោយបិទ​ច្រកព្រំដែនថៃ

មួយរយៈចុងក្រោយនេះ បើទោះបីជាប្រមុខរាជរដ្ឋាភិបាលបានដាក់ឱសានវាទ ដោយបិទការនាំចូលបន្លែនិងផ្លែឈើពីប្រទេសថៃ​ទៅហើយក្តី ក៏គេសង្កេតឃើញថា អាជីវករលក់ដូរនៅផ្សារបន្លែ ភួ ពុយ ក្រុងបាត់ដំបង ក៏នៅតែមានបន្លែផ្គត់ផ្គង់គ្រប់គ្រាន់ដល់គ្រប់តម្រូវការរបស់ប្រជាពលរដ្ឋក្នុងខេត្តផងដែរ។

អាជីវករភាគច្រើនដែលលក់បន្លែផ្លែឈើនៅក្នុងផ្សារ ភូ ពុយ កណ្ដាលក្រុងបាត់ដំបង គឺលក់ដូរដំណាំកសិករផលក្នុងស្រុក បើទោះបីជាមិនមានការនាំចូលបន្លែផ្លែឈើពីប្រទេសថៃក៏ដោយ។

នៅផ្សារបន្លែ ភួ ពុយ មានផ្គត់ផ្គង់បន្លែផ្លែឈើជាច្រើនមុខ ដូចជា ទុរេន សាវម៉ៅ ចេកណាំវ៉ា ខាត់ណា ស្លឹកខ្ទឹម ល្ហុង ប៉េងបោះ ម្ទេស ស្ពៃ ម្អម ជីក្រហម ម្រះព្រៅ ជីរណា ល្ពៅ​ជាដើម គឺជាបន្លែក្នុងស្រុកទាំងអស់ដែលដឹកយកមកពីតាមបណ្ដាស្រុកនានា ក្នុងខេត្តបាត់ដំបង។

លោក សន មករា ជាអាជីវករលក់បន្លែបោះដុំនៅក្នុងផ្សារ ភូ ពុយ បានលើកឡើងថា ជាការពិតបើប្រមុខរាជរដ្ឋាភិបាលបានបិទការនាំចូលបន្លែផ្លែឈើពីប្រទេសថៃ យ៉ាងដូច្នេះគឺពិតជាល្អប្រសើរខ្លាំងណាស់ ព្រោះនៅក្នុងស្រុកក៏មិនខ្វះបន្លែផ្លែឈើសម្រាប់ផ្គត់ផ្គង់ដល់ប្រជាពលរដ្ឋនោះឡើយ។ ហើយម្យ៉ាងវិញទៀតនៅពេលបច្ចុប្បន្នបន្លែផ្លែឈើ ក៏ចាប់ផ្ដើមមានទីផ្សារល្អផងដែរ ដោយសារតែប្រជាពលរដ្ឋយល់និងចាប់ផ្ដើមងាកមកប្រើប្រាស់ផលិតផលក្នុងស្រុក។

ជាចុងក្រោយលោកបានសង្កត់ធ្ងន់ថា លោកគាំទ្រយ៉ាងពេញទំហឹងទៅលើបទបញ្ជារបស់សម្ដេចតេជោ និងសម្ដេចមហាបវរធិបតី ដែលបានដាក់ផែនការតបទៅភាគីថៃយ៉ាងទាន់ពេលវេលាក្រោយពីភាគីយោធាថៃ បានបិទច្រកព្រំដែនកម្ពុជាដោយឯកតោភាគី ដូច្នេះបច្ចុប្បន្នក៏ប្រជាពលរដ្ឋក្នុងស្រុកមិនខ្វះបន្លែផ្លែឈើសម្រាប់បរិភោគឡើយ៕

អត្ថបទ : សោ និយមរ័ត្ន