គយចាប់ដូងគេចពន្ធពីថៃជាង១៥០០គីឡូក្រាមបន្ទាប់ពីព្យាយាមឆ្លងទឹកតាមព្រំដែនឡាវ

កម្លាំង​ចម្រុះប្រឆាំង​បទល្មើសរត់ពន្ធខេត្តព្រះវិហារបានចាប់ដូងក្រអូបគេចពន្ធពីថៃប្រមាណ១៥០០គីឡូក្រាម ដែលព្យាយាម​ឆ្លង​ទឹកចូលតាម​កំពង់ចម្លងឃុំកំពង់ស្រឡៅមួយ ស្រុកឆែប ខេត្តព្រះវិហារ កាលពីថ្ងៃទី​២៥ ខែមិថុនា ឆ្នាំ២០២៥។

យោងតាម​ការ​ចុះផ្សាយរ​របស់មន្ទីរព័ត៌មានខេត្តព្រះវិហារ ដូងក្រអូបទាំង​អស់​នេះដឹក​តាម​រថយន្តមួយគ្រឿងប្រភេទសាំយ៉ុង លួចនាំចេញពីប្រទេសថៃ ឆ្លងកាត់ប្រទេសឡាវ រួចបន្តនាំចូលមកកម្ពុជាតាមទូក ដោយឆ្លងកាត់កំពង់ចម្លងឃុំកំពង់ស្រឡៅមួយ ស្រុកឆែប ខេត្តព្រះវិហារ ដោយគ្មានឯកសារបង់ពន្ធនាំចូលត្រឹមត្រូវ ដែលជាបទល្មើសគេចពន្ធទាំងស្រុង។

វត្ថុតាងដែលចាប់បានរួមមាន ផ្លែដូងក្រអូប ចំនួន ២,៨៥០ផ្លែ ស្មើនឹងប្រមាណ ១,៥០០គីឡូក្រាម ទឹកដូងច្រកដប: ចំនួន ២៨០ដប ស្មើនឹងប្រមាណ ៤២០លីត្រ និងសាច់ដូងចំនួន ២៤គីឡូក្រាម។

បច្ចុប្បន្នរថយន្ត និងវត្ថុតាងដែលចាប់បានទាំងអស់ ត្រូវបានយកមករក្សាទុកបណ្ដោះអាសន្ននៅសាលាស្រុកឆែប ដើម្បីធ្វើកំណត់ហេតុល្មើស និងបន្តនីតិវិធីស្របតាមច្បាប់គយជាធរមាន។

គួរឱ្យដឹង​ដែរថារដ្ឋាភិបាល​ថៃ​បាន​បិទ​ព្រំដែន​ដោយ​ឯកតោភាគី​កាលពីថ្ងៃទី​៧ ខែមិថុនា ឆ្នាំ២០២៥ និង​ត្រូវ​បាន​កម្ពុជាធ្វើការ​ឆ្លើយតប​ដោយ​ការ​បិទព្រំដែនវិញ។ លើសពី​នោះនៅ​ថ្ងៃទី១៧ ខែ​មិថុនា កម្ពុជា​បាន​បិទ​ការ​នាំចូល​បន្លែ ផ្លែ​ឈើ​ទាំង​ស្រុង​ពី​ប្រទេស​ថៃ​ផងដែរ។

យោងតាម​ការ​ចុះផ្សាយរបស់​សារព័ត៌មាន បាងកកប៉ុស្តិ វិស័យអាជីវកម្មឯកជនថៃកំពុងជំរុញឱ្យមានដំណោះស្រាយសន្តិវិធីចំពោះ​បញ្ហា​ព្រំដែនកម្ពុជា-ថៃ ដោយព្រមានថា ភាពតានតឹងកំពុងធ្វើឱ្យប៉ះពាល់ដល់សេដ្ឋកិច្ចក្នុងស្រុក ជាពិសេសការនាំចេញផ្លែឈើ ក្រោយ​កម្ពុជាបិទការនាំចូលបន្លែ-ផ្លែឈើថៃ ដើម្បីឆ្លើយតបនឹងវិធានការបិទ​/កំណត់ម៉ោងព្រំដែនចេញចូលជាឯកតោភាគីរបស់យោធាថៃ។

នាយករដ្ឋមន្ត្រីកម្ពុជា សម្ដេច​ធិបតី ហ៊ុន ម៉ាណែត បាន​លើក​ឡើង​ថាដរាបណាថៃ​មិន​បើក​​ព្រំដែនទៅដូច​​មុន​ថ្ងៃ​ទី​៧ ខែ​មិថុនាទេ កម្ពុជា​នឹង​មិនបើកទ្វារព្រំដែនជា​មួយថៃ​វិញទេ៕

អត្ថបទដោយ ហ៊ុន សិរីវឌ្ឍន៍