៤ថ្ងៃនៃការផ្ទុះអាវុធរវាងកម្ពុជា និងថៃ និស្សិតខ្មែរជាង៣០០នាក់បានចាកចេញពីប្រទេសថៃ ចូលមក​កម្ពុជាវិញ

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡាបានអះអាងថា ក្នុងរយៈពេល៤ថ្ងៃនេះ ពោលគឺចាប់ពីថ្ងៃទី២៦ ដល់ថ្ងៃទី២៩កក្តដា ឆ្នាំ២០២៥នេះ មាននិស្សិតខ្មែរចំនួន៣០៧នាក់ហើយបានចាក់ចេញពីប្រទេសថៃត្រលប់មកប្រទេសកម្ពុជាវិញតាមច្រកប្រទេសឡាវ ក្រោយពីមានការផ្ទុះអាវុធរវាកម្ពុជានិងថៃដែលបង្កឡើងដោយភាគីថៃ។

លោកឧបនាយករដ្ឋមន្ត្រីបានបន្តថា ក្នុងចំណោមនិស្សិតខ្មែរ៣០៧នាក់ចាកចេញពីប្រទេសថៃត្រលប់មកកម្ពុជាវិញក្នុងនោះនៅថ្ងៃទី២៦ និងថ្ងៃទី២៧មានចំនួន១៦៣នាក់ ថ្ងៃទី២៨ ខែកក្កដា មានចំនួន៤០នាក់ និងថ្ងៃទី២៩កក្តដាមាន១០៤នាក់។ និស្សិតខ្មែរទាំង នោះចាកចេញពីប្រទេសថៃមកកាន់ប្រទេសឡាវ ចូលមកប្រទេសកម្ពុជាតាមខេត្ត
ស្ទឹងត្រែង។

លោកឧបនាយករដ្ឋមន្ត្រីបានបញ្ជាក់ថា ក្នុងរយៈពេល៥ថ្ងៃនៃការផ្ទុះអាវុធដាក់គ្នារវាងកម្ពុជាថៃដែលបង្កឡើងដោតភាគីថៃបានបណ្តាលឱ្យសាលារៀនបិទទ្វារចំនួន៦០៥កន្លែង ប៉ះពាល់សិស្សជាង១៥ម៉ឺននាក់ និងគ្រូបង្រៀន៦២៧៦នាក់នៅតាមបណ្តាខេត្តចំនួន៥រួមមានខេត្តព្រះវិហារ ឧត្តរមានជ័យ បន្ទាយមានជ័យ កោះកុង និងខេត្តពោធិ៍សាត់។ លើសពីនេះជម្លោះប្រដាប់អាវុធនេះក៏បានឱ្យក្រសួងអប់រំយុវជន និងកីឡាធ្វើការពន្យាពេលដំណើរការប្រឡងសសញ្ញាបត្រមធ្យសិក្សាទុតិយភូមិឬបាក់ដែលតាមគ្រោងទុកធ្វើនៅថ្ងៃទី១៨ និង១៩ខែសីហា​ ត្រូវលើកទៅធ្វើនៅថ្ងៃទី២៨និង២៩ ខែសីហាឆ្នាំ២០២៥ខាងមុខវិញ៕

អត្ថបទ៖ សំអឿន