សាកលវិទ្យាល័ភូមិន្ទវិចិត្រសិល្បៈ ផ្តល់អាហារូបករណ៍១០០% ដល់កូនៗវីរយុទ្ធជនដែលពលីជីវិត

សាកលវិទ្យាល័យភូមិន្ទវិចិត្រសិល្បៈ បានប្រកាសនៅថ្ងៃទី៣១ ខែកក្កដា ឆ្នាំ២០២៥ ផ្ដល់អាហារូបករណ៍សិក្សាឥតបង់ថ្លៃ១០០% ជូនដល់កូនៗរបស់វីរយុទ្ធជនដែលបានពលីជីវិត ដើម្បីបុព្វហេតុការពារបូរណភាពទឹកដី ក្នុងកម្រិតសិក្សាថ្នាក់បរិញ្ញាបត្រ។

តាមប្រភពខាងលើ អាហារូបករណ៍នេះ ដើម្បីរួមចំណែករាជរដ្ឋាភិបាលក្នុងការកសាង និងអភិវឌ្ឍន៍ធនធានមនុស្ស ព្រមទាំងជួយសម្រាលបន្ទុកហិរញ្ញវត្ថុក្នុងគ្រួសារវីរយុទ្ធជនខ្មែរ ដែលបានពលីជីវិតក្នុងសមរភូមិប្រយុទ្ធទប់ទល់ជាមួយសត្រូវនៅព្រំដែន កម្ពុជា-ថៃ អំឡុងថ្ងៃទី២៤ ដល់ទី២៨ ខែកក្កដា ឆ្នាំ២០២៥។ អាហារូបករណ៍នេះ ផ្តល់រយៈពេល៤ និង៥ឆ្នាំ ក្នុងកម្រិតសិក្សាបរិញ្ញាបត្រគ្រប់ទាំង៥មហាវិទ្យាល័យ នៅសាកលវិទ្យាល័យភូមិន្ទវិចិត្រសិល្បៈ។

ជាមួយគ្នានេះ សាកលវិទ្យាល័យភូមិន្ទវិចិត្រសិល្បៈ ក៏ចូលរួមរំលែកទុក្ខចំពោះការពលីជីវិតរបស់វីរកងទ័ពខ្មែរក្នុងការច្បាំងទប់ទល់ជាមួយការឈ្លានពានរបស់ថៃ តាំងពីថ្ងៃទី២៤ ដល់ទី២៨ ខែកក្កដា ឆ្នាំ២០២៥ ដើម្បីការពារបូរណភាពទឹកដីកម្ពុជា៕