ព័ត៌មានជាតិ

ខេត្តចំនួន១៤ រងគ្រោះដោយទឹកជំនន់បង្កឱ្យស្លាប់មនុស្ស២នាក់ប៉ះពាល់ពលរដ្ឋជិត៦ពាន់គ្រួសារស្រូវនិងដំណាំជាង១ម៉ឺនហិកតា

បានផុស

១០ ខែ មុន

នៅ

ថ្ងៃពុធ ៦ សីហា ២០២៥

ដោយ

ទឹកជំនន់ទ្លេមេគង្គនិងជំនន់ទឹកភ្លៀងបានកើតឡើងខេត្តចំនួន១៤បណ្តាលឱ្យប៉ះពាល់ដល់ប្រជាពលរដ្ឋជិត៦ពាន់គ្រួសារស្មើនឹងជាង២ម៉ឺន៣ពាន់នាក់ ផ្ទះលិចទឹកជិត១០០ខ្នងដំណាំស្រូវនិងដំណាំរួមផ្សំជាង១ម៉ឺនហិកតាព្រមទាំងហេដ្ឋរចនាសម្ព័ន្ធមួយចំនួនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងនៅរសៀលថ្ងៃទី៦ សីហានេះថា ភ្លៀងរដូវវស្សាបានធ្លាក់រាយប៉ាយក្នុងក្របខ័ណ្ឌទូទាំងប្រទេស ដោយសារការទទួលរងឥទ្ធិពលពីខ្យល់មូសុង និរតី ហើយក្នុងនោះបណ្តាខេត្តមួយចំនួននៅភាគពាយ័ព្យបានទទួលរងនូវលំហូរទឹកពីតំបន់ខ្ពង់រាប និងពីប្រទេស ជិតខាងតាមទន្លេ ព្រែក និងអូរធ្វើឱ្យជន់ហៀរលិចដីស្រែចំការ និងហេដ្ឋារចនាសម្ព័ន្ធជនបទមួយចំនួន។

លោកបានបន្តថា ទឹកទន្លេមេគង្គបានទទួលទឹកដែលហូរធ្លាក់តាមដៃទន្លេក្នុងភូមិសាស្ត្រ និងទឹកដែលហូរធ្លាក់ពីអាងទន្លេ មេគង្គលើធ្វើឱ្យមានការជន់ឡើងលឿន និងបង្កការលិចលង់បឋមនៅតាមទីទំនាបតាមដងទន្លេក្នុងខេត្តក្រចេះ ស្ទឹងត្រែង កំពង់ចាម និងខេត្តត្បូងឃ្មុំ។

លោកបានបន្តទៀតថា គិតត្រឹមថ្ងៃទី២៩ ខែកក្កដា ឆ្នាំ២០២៥ កន្លងទៅនេះមានខេត្តចំនួន១៤រួម មានខេត្តបាត់ដំបង បន្ទាយមានជ័យ ពោធិ៍សាត់ ប៉ៃលិន កំពង់ធំ សៀមរាប កំពង់ចាម ព្រៃវែង កណ្តាល តាកែវ ក្រចេះ ស្ទឹងត្រែង កោះកុង និងខេត្តព្រះសីហនុបានរងគ្រោះដោយសារជំនន់ទឹកភ្លៀង និងជំនន់ទន្លេមេគង្គប៉ះពាល់ប្រជាជនប៉ះពាល់ ៥.៩៨១គ្រួសារ មានប្រមាណ ២៣.៩២៤នាក់ផ្ទះលិចទឹក ៩៨ខ្នង សាលារៀន ២កន្លែង វត្តអារាម ២កន្លែងដំណាំស្រូវប៉ះពាល់ ១៣.៨៨៧ហិកតា និងខូចខាត ៣.១៦១ហិកតាដំណាំរួមផ្សំប៉ះពាល់ ៦២ហិកតា និងខូចខាត ៣ហិកតា និង ហេដ្ឋារចនាសម្ពន្ធ័ជនបទមួយចំនួនដូចជាលិចផ្លូវលំច្រើនខ្សែក្នុងរយៈពេលខ្លី និងដាច់ផ្លូវ ២កន្លែង ក្នុងខេត្ត កោះកុង និងខេត្តព្រះសីហនុ ខូចខាតស្ពានឈើ ៣កន្លែងផ្ទះរលំ ១ខ្នង និងប្រជាជនរងគ្រោះស្លាប់ ២នាក់ (ស្រី១)។

យោងសេចក្តីជូនដំណឹងរបស់ក្រសួងកសិកម្ម រុក្ខាប្រមាញ់ និងនេសាទ ល្បឿននៃការងារបង្កបង្កើនផល គិតត្រឹមថ្ងៃទី១៧ ខែកក្កដា ឆ្នាំ២០២៥ អនុវត្តបានចំនួន ២.៤៣៥.៣៥៣ហិកតា ស្មើនឹង ៨១,៣៣% នៃ ផែនការដាំដុះ និងលឿនជាងឆ្នាំមុន ១៤៤.៧៥៨ ហិកតា៕

អត្ថបទ ៖ សំអឿន