អ្នកវិភាគ ស្នើកុំឱ្យបង្ហាញមុខទាហានជួរមុខ និងគួរលើកតម្កើងទាហានទាំងអស់ ជាជាងលើកតម្កើងតែទាហានម្នាក់ៗ

បណ្ឌិត យង់ ពៅ អ្នកជំនាញភូមិសាស្ត្រនយោបាយ នៅរាជបណ្ឌិត្យសភាកម្ពុជា បានអំពាវនាវដល់ពលរដ្ឋគ្រប់រូបកុំបង្ហោះមុខកងទ័ពជួរមុខលើបណ្តាញសង្គម អាចបង្កគ្រោះថ្នាក់ដល់កងទ័ព ហើយពលរដ្ឋគួរនាំគ្នាលើកតម្កើងទាហានទាំងអស់ដូចៗគ្នា ជាជាងលើកតម្កើងតែទាហានម្នាក់ៗ ព្រោះពួកគាត់សុទ្ធតែជាអ្នកលះបង់ដើម្បីជាតិ។

លោកបណ្ឌិត យង់ ពៅ ប្រាប់មក កម្ពុជាថ្មី ថា៖ “ការលើកទឹកចិត្តកងទ័ពជួរមុខ បងប្អូនប្រជាពលរដ្ឋយើងបានចូលរួមយ៉ាងសស្រាក់សស្រាំហើយ ប៉ុន្តែមានចំណុចខ្លះក៏យើងគួរកែលម្អដែរ ជាពិសេសការលើកម្នាក់ៗ ដែលបង្ហាញម្នាក់ៗ”។

យ៉ាងណា ការលើកតម្កើងតែកងទ័ពណាម្នាក់ៗខ្លាំងពេក អាចនាំឱ្យប៉ះពាល់ដល់ទឹកចិត្តកងទ័ពដទៃទៀត ដែលពួកគាត់សុទ្ធតែបានលះបង់ពលីក្នុងកិច្ចការពារបូរណភាពទឹកដីកម្ពុជា ពីការឈ្លានពានរបស់ថៃ។

បន្ថែមពីនេះ អ្នកជំនាញភូមិសាស្ត្រនយោបាយ​ខាងលើ ក៏បានអំពាវនាវដល់ប្រជាពលរដ្ឋ សូមកុំបង្ហាញមុខរបស់កងទ័ពជួរមុខកម្ពុជា ទៅក្នុងបណ្តាញសង្គម ព្រោះលោកបារម្ភថា ថៃអាចនឹងប្រើប្រាស់បច្ចេកវិទ្យាផ្សេងៗវាយប្រហារទាហានកម្ពុជា។ លោកបន្តទៀតថា សាធាណរជនទាំងអស់ ប្រសិនជាចង់ផ្តល់ជំនួយដល់កងទ័ពជួរមុខ ក៏អាចជួយបាន ប៉ុន្តែមិនចាំបាច់ថតយកសកម្មភាពភាព ឬជាប់ទីតាំង យកទៅបង្ហោះលើបណ្តាញសង្គមឡើយ ពោល គឺជួយដោយចិត្តស្នេហា និងមានមនសិការជាតិ ចៀសវាងបង្កគ្រោះថ្នាក់ដល់ទាហានជួរមុខ។

លោកនិយាយថា៖ “សូមជួយដោយទឹកចិត្តស្រឡាញ់ទឹកដី ​ស្រឡាញ់កងទ័ពជួរមុខ សូមជួយដោយមនសិការ សូមជួយទៅដោយចំនេះដឹង កុំឱ្យជួយហើយបង្កជាគ្រោះថ្នាក់ទៅវិញ”។

ពាក់ព័ន្ធជាមួយនឹងការជួយជំនួយដល់កងទ័ពនេះ លោកបណ្ឌិត ក៏បានផ្តាំដល់ពលរដ្ឋចូលរួមជួយឱ្យបានសមស្របតាមតម្រូវការជាក់ស្តែងរបស់កងទ័ព ទាំងចំណីអាហារ ឬសម្ភារៈប្រើប្រាស់ផ្សេងៗ៕