បេក្ខជនត្រៀមប្រឡងបាក់ឌុបមួយចំនួន នៅខេត្តរតនគិរី ចាប់ផ្តើមទៅរកបន្ទប់ជួលនៅក្បែរមណ្ឌលប្រឡង

សិស្សានុសិស្សមួយចំនួនដែលសិក្សានៅខេត្តរតនគិរី បានត្រៀមខ្លួនជាស្រេចក្នុងការប្រឡងសញ្ញាបត្រមធ្យមសិក្សាទុតិយភូមិ ដោយស្វ័យសិក្សាខ្លួនឯង និងចាប់ផ្តើមជិះទៅរកបន្ទប់ជួលជាបណ្តើរៗ នៅក្បែរមណ្ឌលប្រឡង ដើម្បីបង្កលក្ខណៈងាយស្រួល។ សម័យប្រឡងបាក់ឌុប ២៨-២៩ សីហា ២០២៥។ នៅមុនការប្រឡងមកដល់ មានសិស្សមកពីបណ្តាស្រុកនានា ក្នុងខេត្តរតនគិរីបានចាប់ផ្តើម​ជិះរក​បន្ទប់ជួលជាបណ្តើរហើយ នៅក្នុងក្រុងបានលុង  ដើម្បីត្រៀមរៀបចំខ្លួនសម្រាប់ការ​ប្រឡងដ៏​សំខាន់មួយនេះ។

កញ្ញា កៃ សុខជា ជាសិស្សរៀនថ្នាក់ទី១២ នៃវិទ្យាល័យវិរៈជ័យ បានប្រាប់ថា រូបគាត់ និងមិត្ត​ភ័ក្តិស្រីៗរៀនជាមួយគ្នា បានហ្វឹកហាត់ធ្វើលំហាត់ និងទន្ទេញមេរៀនជារៀងរាល់ថ្ងៃ និងបាន​សម្រេចចិត្តរួមគ្នាទៅរកបន្ទប់ជួលតម្លៃ ៣ម៉ឺនរៀល ដែលមានទីតាំងនៅជិតមណ្ឌលប្រឡង។

កញ្ញាបន្តថា៖«រាល់ថ្ងៃខ្ញុំបានអានមេរៀន រៀនធ្វើលំហាត់ និងរំលឹកមេរៀនឡើងវិញ ដូចជា មុខវិជ្ជា សិក្សាសង្គម ប្រវត្តិសាស្ត្រ ផែនដី ភាសាខ្មែរអានរឿងអក្សរសិល្ប៍ខ្មែរ និងធ្វើតែងសេចក្តី ដោយឡែក គណិតវិទ្យាវិញ ប្អូនមើលរូបមន្តគណិតវិទ្យា រូបវិទ្យា និងបានអានកំណែវិញ្ញាសាផ្សេងជាច្រើន»។ កញ្ញាអះអាងថា  នឹងព្យាយាមប្រឹងប្រែងឱ្យ​អស់ពីលទ្ធភាពក្នុងការប្រឡងដើម្បីសម្រេចក្តីស្រមៃដែលបាន​សិក្សាអស់​រយៈពេល ១២ឆ្នាំ»។ សម្រាប់យុវសិស្សរូបនេះ បង្ហាញអារម្មណ៍ថា ភ័យផង អរផង ហើយសង្ឃឹមថា នឹងប្រឡងជាប់។

បេក្ខជនមួយរូបទៀតឈ្មោះ ផូស សិទ្ធ ជនជាតិដើមភាគតិច ក៏បានលើកឡើងដែរថា នៅមុនការប្រឡងមកដល់ បានរៀនធ្វើលំហាត់គណិតវិទ្យា និងបានអនុវត្តធ្វើសំណេរតែងសេចក្តីខ្លះៗ។ ក្រៅពីស្វ័យសិក្សាខ្លួនឯង មិនខុសពីបេក្ខជនខាងលើ លោក សិទ្ធ ក៏បានជិះទៅរកបន្ទប់ជួលមុនការប្រឡងដែរ។ យុវសិស្ស សិទ្ធ បានថ្លែងថា៖« សម្រាប់ខ្ញុំបានត្រៀមធ្វើដំណើរទៅក្រុងបានលុង រកបន្ទប់ស្នាក់នៅឱ្យ​បានមុន១ថ្ងៃ នៅថ្ងៃទី ២៧ ខែ សីហា ដោយសារការប្រឡងនៅថ្ងៃ២៨-២៩ ខែ សីហា ឆ្នាំ ២០២៥»។

សម្រាប់មន្ទីរអប់រំ យុវជន និង កីឡា ខេត្តរតនគិរី សម្រេចជ្រើសរើសយកវិទ្យល័យ​ និងអនុវិទ្យាល័យចំនួន ធ្វើជាមណ្ឌលប្រឡងទាំងថ្នាក់វិទ្យាសាស្រ្ត និងវិទ្យាសាស្រ្តសង្គម។ ក្នុងនោះ ថ្នាក់វិទ្យាសាស្រ្តសង្គម ប្រឡងនៅ វិទ្យាល័យសម្តេចឳ សម្តេចម៉ែ វិទ្យាល័យហ៊ុនសែន ភូមិថ្មី។ ចំណែកថ្នាកវិទ្យាសាស្រ្ត ប្រឡងនៅអនុវិទ្យាល័យ ប៊ូ ថង ទេសអន្លុង។

ក្រសួងអប់រំយុវជន និងកីឡា នឹងបិទផ្សព្វផ្សាយបញ្ជីឈ្មោះបេក្ខជន លេខតុ លេខបន្ទប់ និងបទប្បញ្ញត្តិផ្សេងៗទាក់ទងនឹងការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅតាមមណ្ឌលប្រឡងនានានៅថ្ងៃទី២៧ ខែសីហាឆ្នាំ២០២៥ វេលាម៉ោង៩ព្រឹក៕

អត្ថបទ៖ ខៀវ ចាប