ក្មេងប្រុស-ស្រី ៣ នាក់លង់ទឹកស្លាប់ពេលចុះទៅរាវលៀស

ក្មេងប្រុស ស្រីចំនួន ៣ នាក់បានលង់ទឹកស្លាប់ពេលចុះទៅរាវលៀសក្នុងរណ្តៅដីមួយកន្លែងស្ថិតនៅភូមិដើមចំរៀក ឃុំស្តេចគង់ខាងលិច ស្រុកបន្ទាយមាស ខេត្តកំពត កាលពីរសៀលថ្ងៃទី ០៨ ខែមេសា ឆ្នាំ២០២១។

សមត្ថកិច្ចមូលដ្ឋានបានប្រាប់ឲ្យដឹងថា កុមាររងគ្រោះទាំង៣នាក់ មានឈ្មោះ ហង់ ស្រីតី អាយុ ១៣ឆ្នាំ យុវតី សុង រតនា អាយុ១៣ ឆ្នាំ និងក្មេងប្រុស ហង់ ទី អាយុ៩ឆ្នាំ អ្នកទាំងបីមានទីលំនៅ ភូមិជ្រោះអូតាសោម ឃុំប្រាសាទភ្នំខ្យង ស្រុកកំពង់​ត្រាច ខេត្តកំពត។ 

សមត្ថកិច្ចបានរៀបរាប់ទៀតថា កាលពីវេលាម៉ោង៤៖៤០នាទី រសៀលថ្ងៃទី០៨ ខែមេសា នគរបាលមូលដ្ឋានបានទទួលដំណឹងថាមានក្មេងប្រុសស្រី៣នាក់បានលង់ទឹកស្លាប់ក្នុងរណ្តៅដីមួយកន្លែងបន្ទាប់ពីពួកគេបានចុះរាវលៀសនៅទីនោះ។

ក្រោយពីទទួលបានព័ត៌មានភ្លាមៗ កម្លាំងនគរបាលប៉ុស្តិ៍បានទៅដល់កន្លែងកើតហេតុ សហការជាមួយប្រជាពលរដ្ឋ និងសាច់ញាតិកុមាររងគ្រោះចុះរាវរកទើបប្រទះឃើញកុមារាកុមារីទាំង៣នាក់ជាបន្តបបន្ទាប់តែពួកគេបានស្លាប់អស់ទៅហើយ។ 

ប្រភពដដែលបានបញ្ជាក់ថា តាមរយៈការធ្វើកោសល្យវិច្ច័យពីមន្ត្រីជំនាញបច្ចេកទេសឃើញថាកុមារទាំងបីនាក់ពិតជាស្លាប់ដោយសារលង់ទឹកប្រាកដមែន ហើយក៏ប្រគល់សពកុមាររងគ្រោះទាំង៣ជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ៖សេង ណារិទ្ធ