សន្តិសុខសង្គម

ក្មេងប្រុសម្នាក់ ចុះលេងទឹកស្រះវត្ត លង់ស្លាប់ បង្កការភ្ញាក់ផ្អើល

បានផុស

៤ សប្តាហ៍ មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

ក្មេងប្រុសម្នាក់ ក្រោយពេលចេញពីរៀន បានចុះលេងទឹកស្រះ បណ្ដាលឲ្យលង់ស្លាប់ បង្កការភ្ញាក់ផ្អើលកាលពីវេលាម៉ោង ១០ និង ៣០ នាទីព្រឹក ថ្ងៃទី ៥ ខែវិច្ឆិកា ឆ្នាំ ២០២៤ នៅក្នុងទឹកស្រះវត្តអង្គត្រគៀត ភូមិអង្គត្រគៀត សង្កាត់កន្ទោក ខណ្ឌកំបូល រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្មេងប្រុសរងគ្រោះឈ្មោះ ង ដ វ អាយុ ៦ ឆ្នាំ ជាសិស្សថ្នាក់ទី ១ នៅសាលាបឋមសិក្សាវត្តអង្គត្រគៀត (ក្នុងបរិវេណវត្តអង្គត្រគៀត) មានឪពុកជាសន្តិសុខ និងម្ដាយជាកម្មការិនីរោងចក្រ មានស្រុកកំណើតនៅភូមិដើមគរ ឃុំក្អែកយំ ស្រុកបុរីជលសារ ខេត្តតាកែវ និងស្នាក់នៅផ្ទះជួលក្នុងភូមិកើតហេតុខាងលើ។

តាមប្រភពកន្លែងកើតហេតុបានឲ្យដឹងថា នៅមុនពេលកើតហេតុឪពុកម្ដាយបានចេញទៅធ្វើការ ចំណែកក្មេងប្រុសរងគ្រោះ និងបងស្រីម្នាក់ទៀត បាននាំគ្នាទៅរៀន ប៉ុន្តែរៀនថ្នាក់ខុសគ្នា។ ក្រោយមក ក្មេងប្រុសរូបនោះ ចេញពីរៀនមុនបងស្រី ប៉ុន្តែអត់ទៅផ្ទះទេ រង់ចាំបងស្រីចេញពីរៀននៅវេលាម៉ោង ១១ ព្រឹក ទើបទៅផ្ទះទាំងអស់គ្នា។

ប្រភពដដែលបានឲ្យដឹងបន្តថា ពេលនោះក្មេងប្រុសខាងលើបានដើរទៅលេងនៅស្រះទឹកនោះ ហើយលោកគ្រូបង្រៀន ហាមមិនឲ្យលេងទឹកទេ និងហៅឲ្យដើរចេញដែរ ប៉ុន្តែក្មេងប្រុសនេះអត់ព្រមចេញឡើយ។ ក្រោយមកក៏បានចុះលេងទឹកស្រះខាងលើដែលមានជម្រៅប្រហែល ១០ ម៉ែត្រ ក៏លង់លិចបាត់ទៅក្នុងទឹកតែម្ដង ដោយគ្មាននរណាជួយទាន់ឡើយ។

ប្រភពខាងលើបានឲ្យដឹងទៀតថា ក្រោយពេលក្មេងប្រុសនោះលង់ទឹក មានក្មេងៗ ១ ក្រុមទៀត បានរត់ទៅប្រាប់ជាងដែលកំពុងសាងសង់ចេតិយក្នុងវត្តនោះឲ្យជួយ ទើបបង្កការភ្ញាក់ផ្អើល ហើយក្រុមជាងបាននាំគ្នាចុះរាវក៏រកឃើញក្មេងប្រុសរងគ្រោះទើរនៅលើកាំជណ្ដើរស្រះទឹក។ បន្ទាប់មកបានជួយសង្គ្រោះបឋម ឪពុកម្ដាយក៏បាននាំទៅកាន់មន្ទីរពេទ្យ ប៉ុន្តែពេលទៅដល់ត្រូវគ្រូពេទ្យប្រាប់ថា ក្មេងប្រុសនោះស្លាប់បាត់ទៅហើយ ទើបដឹកសពត្រលប់ទៅកន្លែងកើតហេតុវិញ ដើម្បីឲ្យនគរបាលធ្វើកោសល្យវិច័យ ហើយត្រៀមយកសពទៅធ្វើបុណ្យនៅវត្តជន្លង់ម្លូ សង្កាត់ភ្លើងឆេះរទេះ ខណ្ឌកំបូល៕

អត្ថបទ ៖សំណាង