អភិបាលខេត្តសៀមរាប ចុះពិនិត្យជំនន់ទឹកភ្លៀង នៅក្រុងសៀមរាប ស្រុកពួក និងស្រុកអង្គរធំ

នៅព្រឹកថ្ងៃទី២៤ ខែកញ្ញា ឆ្នាំ២០២៥ លោក ប្រាក់ សោភ័ណ អភិបាលខេត្ត និងអភិបាលរងខេត្តបានដឹកនាំថ្នាក់ដឹកនាំ និងមន្ត្រីនៃមន្ទីរពាក់ព័ន្ធ អាជ្ញាធរស្រុក ចុះពិនិត្យផ្ទាល់ពីស្ថានភាពនៃផលប៉ះពាល់ដោយសារជំនន់ទឹកភ្លៀង នៅក្នុងភូមិសាស្ត្រក្រុងសៀមរាប ស្រុកពួក ស្រុកអង្គរធំ និងភូមិសាស្ត្រស្រុកមួយចំនួនទៀត ក្នុងខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះក្រុង ស្រុក ដែលរងផលប៉ះពាល់ខ្លាំងរួមមាន ក្រុងសៀមរាប ស្រុកពួក និងស្រុកអង្គរធំ ដែលធ្វើឲ្យមានជំនន់ទឹកភ្លៀង បានប៉ះពាល់នៅផ្លូវជាតិ និងផ្សារស្រុកពួក ព្រមទាំលំនៅដ្ឋានប្រជាពលរដ្ឋខាងលើនោះផងដែរ ដោយសារតែមានភ្លៀងធ្លាក់ជាប់ៗគ្នាប៉ុន្មានថ្ងៃនេះ។

សូមជម្រាបថា កាលពីថ្ងៃទី១៩ ខែកញ្ញា រដ្ឋបាលខេត្តសៀមរាប ក៏បានចេញសេចក្តីជូនដំណឹងលើទំព័រហ្វេសប៊ុកផ្លូវការ ពីស្ថានភាពអាកាសធាតុ និងការបង្ការ តាមដាន គ្រប់គ្រង និងឆ្លើយតបគ្រោះមហន្តរាយទឹកជំនន់ និងបង្ការគ្រោះថ្នាក់លង់ទឹក ក្នុងភូមិសាស្ត្រ ក្រុង ស្រុក ខេត្តសៀមរាប ដែលទទួលរងឥទ្ធិពលប្រព័ន្ធវិសម្ពាធ គួបផ្សំនឹងឥទ្ធិពលខ្យល់មូសុងនិរតីខ្លាំង។ រដ្ឋបាលខេត្ត បានណែនាំឱ្យពលរដ្ឋមានការប្រុងប្រយ័ត្នខ្ពស់ អប់រំកូនចៅឱ្យបានល្អ កុំឱ្យលេងនៅក្បែរទីតាំងដែលមានទឹកហូរខ្លាំង និងប្រុងប្រយ័ត្នខ្ពស់លើការធ្វើដំណើរតាមផ្លូវទឹក។

បន្ថែមពីនេះ រដ្ឋបាលខេត្តសៀមរាប ក៏បានណែនាំដល់អាជ្ញាធរពាក់ព័ន្ធ តាមដាន ពិនិត្យ និងរៀបចំផែនការអន្តរាគមន៍ទាន់ពេលវេលាក្នុងករណីចាំបាច់ត្រូវជម្លៀសពលរដ្ឋទៅទីទួលសុវត្ថិភាពដោយប្រការណាមួយ។​ជាមួយគ្នានេះ ត្រូវផ្សព្វផ្សាយឱ្យបានទូលំទូលាយដល់ពលរដ្ឋពីអនាម័យ ចៀសវាងឆ្លងជំងឺផ្សេងៗ៕

ដោយ៖ គឿន វេត