អាជ្ញាធរចុះរៀបចំសណ្តាប់ធ្នាប់បរិវេណផ្សារសែនមនោរម្យ ក្រោយអាជីវករផ្សាររំលោភចំណីផ្លូវដាក់លក់ទំនិញ

ខេត្តមណ្ឌលគិរី៖ មន្ត្រីជំនាញនៃក្រុមលេខាធិការដ្ឋានគណៈបញ្ជាការឯកភាពក្រុងសែនមនោរម្យ នៅថ្ងៃទី ០១ ខែតុលានេះ បានចុះរៀបចំសណ្ដាប់ធ្នាប់របៀបរៀបរយនៅបរិវេណផ្សារសែនមនោរម្យ ដោយសារអាជីវករមួយចំនួនដាក់តាំងលក់ទំនិញអត់មានសណ្តាប់ធ្នាប់ ធ្វើឱ្យប៉ះពាល់សោភណ្ឌភាព និងកកស្ទះចរាចរណ៍។ ការចុះត្រួតពិនិត្យនេះ បន្ទាប់ពីទទួលបានសំណូមពីប្រជាពលរដ្ឋដែលនិយមដើរទិញទំនិញនៅផ្សារនេះ ដោយលើកឡើងថា អាជីវកខ្លះរំលោភចំណីផ្លូវសាធារណៈដាក់តាំងលក់ទំនិញអត់មានសណ្តាប់ធ្នាប់។

លោក មាស ចន្នី អភិបាលរងក្រុងសែនមនោរម្យខេត្តមណ្ឌលគិរី បានប្រាប់កម្ពុជាថ្មី ឱ្យដឹងថា ជារៀងរាល់ខែម្តង ក្នុងនាមគណៈបញ្ជាការឯកភាពក្រុង តែងតែដឹកនាំកម្លាំងចុះត្រួតពិនិត្យទាំងក្នុងផ្សារ និងបរិវេណជុំវិញ ដើម្បីរៀបចំសណ្ដាប់ធ្នាប់ផ្សារឱ្យមានសោភណភាព និងបង្កលក្ខណៈងាយស្រួលដល់ពលរដ្ឋដែលនិយមដើរផ្សារឱ្យមានភាពទូលាយ។ លោកបញ្ជាក់ថា ប្រតិបត្តិការចុះត្រួតពិនិត្យលើកនេះ អាជ្ញាធរបានដកហូតសម្ភាររបស់អាជីវករមួយចំនួនដែលដាក់លក់សំពីងសំពោង មានភាពរញ៉េរញ៉ៃដែលធ្វើឱ្យប៉ះពាល់ដល់សោភណភាព និងរបៀបរៀបរយសណ្ដាប់ធ្នាប់ផ្សារ។

លោកគូសបញ្ជាក់ថា៖« អាជ្ញាធរមិនបានប៉ះពាល់ ឬដកហូតទ្រព្យសម្បត្តិ ដូចជាបន្លែ ផ្លែឈើ ត្រីសាច់ អាជីវករនោះឡើយ អ្វីដែលបានដកហូតនោះដូចជាសំបកឡាំង កេសស្នោ កញ្ច្រែងជ័រ ជើងឆ័ត មួយចំនួនតែប៉ុណ្ណោះ និយាយរួមសម្ភាររំលោភចិញ្ចើមផ្លូវ»។ លោកបន្តថា ការដកហូតនេះ ដើម្បីជាការក្រើនរំលឹក និងព្រមានដល់អាជីវករផ្សេងទៀតកុំឱ្យយកគំរូតាម ពោលចៀសវាងរំលោភផ្លូវសាធារណៈដាក់លក់ទំនិញរបស់ខ្លួនដែលធ្វើឱ្យប៉ះពាល់សោភណភាពផ្សារ និងអនាម័យ។

បើតាមអភិបាលរងក្រុង ទោះបីជាអាជ្ញាធរមានផែនការរៀបចំសណ្តាប់ធ្នាប់ជារៀងរាល់ខែម្តង និងបានចុះអប់រំណែនាំជារឿយៗក្តី ប៉ុន្តែអាជីវករមួយចំនួនតួចនៅតែឆ្លៀតឱកាសបំពានចំណីផ្លូវសាធារណៈដាក់លក់ទំនិញផ្ទាល់ខ្លួន។

លោកបានបញ្ជាក់ថា ក្នុងនាមអាជ្ញាធរក្រុងនៅតែបន្តអប់រំផ្សព្វផ្សាយទៅដល់ពួកគាត់ឱ្យយល់ដឹងកាន់តែច្បាស់អំពីលក់ដូរមានសណ្ដាប់ធ្នាប់ និងសោភណភាព ដើម្បីទីក្រុងស្អាតស្អាតសេវាល្អ ធ្វើយ៉ាងណាទាក់ទាញភ្ញៀវទេសចរជាតិនិងអន្តរជាតិមកកម្សាន្តក្នុងខេត្តមណ្ឌលគិរីបន្ថែមទៀត៕

អត្ថបទ៖ រៀម សុខហេង