របាយការណ៍៖ ពលរដ្ឋខេត្តមណ្ឌលគិរី កើនដល់ជាង ១០ម៉ឺននាក់ ជាមធ្យមពលរដ្ឋរកប្រាក់ចំណូលជាង ២ ០០០ ក្នុងមួយឆ្នាំ

យោងតាមរបាយការណ៍របស់មន្ទីរផែនការ ខេត្តមណ្ឌលគិរី បង្ហាញថា គិតពីឆ្នាំ២០២១ ដល់ឆ្នាំ២០២៤ រយៈពេល៤ឆ្នាំ​ចុងក្រោយនេះ មានប្រជាពលរដ្ឋរស់នៅទូទាំងខេត្តសរុបចំនួន ១០៦ ៤៤០ នាក់ ស្មើនិង ២៦២ ៦៨៥ គ្រួសារ ក្នុងនោះប្រុសមានចំនួន ៥៤ ០៦០នាក់ និងស្រី មានចំនួន ៥២ ៣៨០ នាក់ កើនឡើង ៦,១៩% និងមានជនជាតិដើមភាគតិត ៤៣ ១០១ នាក់ ស្មើ ១០ ០៥៦គ្រួសារ។

ខេត្តមណ្ឌលគិរី មានផ្ទៃដីសរុប ១៤ ២៨៨ គីឡូម៉ែត្រការ៉េ  ដែលមានផ្ទៃដីធំជាងគេបើប្រៀបនិងខេត្តដ៏ទៃទៀតស្ថិតនៅភូមិភាគឦសាននៃប្រទេសកម្ពុជា និងមានចម្ងាយប្រមាណ ៤០០ គីឡូម៉ែត្រ ពីរាជធានីភ្នំពេញ។ ខេត្ត​មួយនេះមានសក្តានុពលលើវិស័យទេសចរណ៍ និងអំណោយផលលើវិស័យកសិកម្ម​ដោយសារដីមានជីវជាតិ។

ទន្ទឹមនឹងនោះ ដោយសារខេត្តមណ្ឌលគិរី ពឹងផ្អែកទៅលើមុខរបរកសិកម្ម និងវិស័យទេសចរណ៍ ប្រជាពលរដ្ឋអាចរកប្រាក់ចំណូលបានមធ្យម(GDP)ក្នុងម្នាក់ចាប់ពី ២ ១២២ ដុល្លារ ក្នុងមួយឆ្នាំផងដែរ។

បើតាមរបាយការណ៍មន្ទីរផែនការខេត្ត សម្រាប់ក្រុង-ស្រុកទូទាំងខេត្តដែលពលរដ្ឋរស់នៅច្រើនជាងគេ គឺនៅស្រុកកែវសីមាដែលមានប្រជាជនចំនួន ៣០ ២៧៩នាក់ ស្រី ១៤ ៧២៩នាក់ នៅស្រុកកោះញែក មានប្រជាជន ២៩ ០៦៩នាក់ ស្រី ១៤ ៣៧៩នាក់ នៅស្រុកពេជ្រាដា មានពលរដ្ឋចំនួន២៣២៤១ ស្រី១១ ២៨៣នាក់ នៅក្រុងសែនមនោរម្យ មានពលរដ្ឋចំនួន១៦ ៦៥៩ នាក់ស្រីចំនួន ៨ ២៧៣នាក់ និងស្រុកអូររាំង ដែលមានប្រជាពលរដ្ឋតិចជាងគេត្រឹម ៧ ១៩២ នាក់ និងស្រី ៣ ៧១៦ នាក់ប៉ុណ្ណោះ ៕

អត្ថបទ៖ រៀម សុខហេង