រឿងបើកសវនាការលោក កឹម សុខា ៖ ប្រធានតុលាការក្រុងភ្នំពេញថា នឹងពិភាក្សាគ្នានៅថ្ងៃទី១៥ ខែនេះ

លោក តាំង ស៊ុនឡាយ ប្រធានសាលាដំបូងរាជធានីភ្នំពេញ បានអះអាងប្រាប់សារព័ត៌មានកម្ពុជាថ្មីថា កាលបរិច្ឆេទនៃការបើកបន្តសវនាការសំណុំរឿងលោក កឹម សុខា ប្រធានអតីតគណបក្សសង្រ្គោះជាតិនៅមិនទាន់បានកំណត់នៅឡើយទេ។ លោកថា លោកកំពុងរង់ចាំពិភាក្សាជាមួយក្រុមប្រឹក្សាជំនុំជម្រះសិន ដែលការពិភាក្សានេះ នឹងធ្វើឡើងនៅថ្ងៃទី១៥ ខែធ្នូ ខាងមុខនេះ។

បើតាមលោក តាំង ស៊ុនឡាយ ការរង់ចាំដល់ថ្ងៃទី១៥ ខែធ្នូនេះ ដោយសារតែចៅក្រមនៃក្រុមប្រឹក្សាជំនុំជម្រះមួយរូបកំពុងជាប់ធ្វើចត្តាឡីស័កនៅឡើយ។ គិតមកដល់ពេលនេះ សំណុំរឿងរបស់លោក កឹម សុខា បានផ្អាកជិត២ឆ្នាំទៅហើយ ពោល គឺតាំងពីដើមឆ្នាំ២០២០មកម្លេះ ដោយសារតែឆ្លងរាលដាលនៃជំងឺកូវីដ១៩នៅក្នុងប្រទេសកម្ពុជា។ ក្រោយមក ក្រុមមេធាវីរបស់លោក កឹម សុខា បានស្នើសុំបន្តសវនាការឡើងវិញជាច្រើនលើក ប៉ុន្តែ តុលាការបានបដិសេធរហូត ក្រោមហេតុផលស្ថានភាពការឆ្លងរាលដាលនៃកូវីដ១៩ នៅមិនទាន់ល្អនៅឡើយ។

លោកកឹម សុខា ត្រូវបានតុលាការក្រុងភ្នំពេញចោទ​ប្រកាន់ពីបទ សន្ទិដ្ឋិភាពជាមួយបរទេសចង់ផ្តួលរំលំរដ្ឋាភិបាលកម្ពុជា។ បន្ទាប់ពីត្រូវបានឃុំខ្លួននៅក្នុងពន្ធនាគារ និងនៅក្នុងផ្ទះមួយរយៈមក តុលាការក្រុងភ្នំពេញក៏បានចាប់ផ្តើមបើកសវនាការសំណុំរឿងលោកកឹម សុខា កាលពី នៅថ្ងៃទី១៥ ខែមករា ឆ្នាំ២០២០។ បច្ចុប្បន្ន តុលាការបានផ្តល់សេរីភាពដើរហើរ និងធ្វើសកម្មភាពគ្រប់បែបយ៉ាងដល់លោកកឹម សុខា វៀរលែងតែ ការធ្វើដំណើរចេញទៅក្រៅប្រទេស និងធ្វើសកម្មភាពពាក់ព័ន្ធនឹងនយោបាយ៕

អត្ថបទ៖ វណ្ណ​​ សុគន្ធា