អ្នកនាំពាក្យ៖ ត្រឹមជួបជាមួយកូនក្តី មិនចោទជាបញ្ហាឡើយ លើកលែងតែមានចេតនាផ្សេងពីនេះ

នៅថ្ងៃទី១៥ ខែមីនានេះ លោក ជិន ម៉ាលីន អ្នកនាំពាក្យ ក្រសួងយុត្តិធម៌ បានពន្យល់មេធាវីការពារក្ដីលោក កឹម សុខា ថា ត្រឹមតែចេតនាជួបជាមួយកូនក្ដី គឺអាចស្នើសុំការអនុញ្ញាតពីព្រះរាជអាជ្ញាបាន មិនចោទជាបញ្ហាឡើយ លើកលែងតែមានចេតនាផ្សេងពីនេះ។

ការពន្យល់របស់អ្នកនាំពាក្យក្រសួងយុត្តិធម៌បែបនេះ បានធ្វើឡើងបន្ទាប់ពីសហមេធាវីការពារក្ដីរបស់លោក កឹម សុខា បានចេញសេចក្ដីថ្លែងការណ៍មួយស្ដីពីការរំលោភសិទ្ធិជំនួយមេធាវីសម្រាប់លោក កឹម សុខា។ សេចក្ដីថ្លែងការណ៍នេះ បានលើកឡើងថា សហមេធាវីការពារក្តីបានទៅផ្ទះលោក កឹម សុខា ដើម្បីជួបកូនក្តី ដែលកំពុងស្ថិតនៅក្រោមការត្រួតពិនិត្យតាមផ្លូវតុលាការក្នុងការពិគ្រោះយោបល់ច្បាប់ និងរៀបចំពាក្យបណ្ដឹងឧទ្ធរណ៍លើសាលក្រមរបស់សាលាដំបូងរាជធានីភ្នំពេញ។ ប៉ុន្តែមេធាវីលោក កឹម សុខា បានអះអាង ត្រូវបានកងកម្លាំងដែលយាមនៅទីនេះបានរារាំង ហើយមិនអនុញ្ញាតឲ្យសហមេធាវីជួបជាមួយលោក កឹម សុខា ឡើយ ដោយណែនាំឲ្យទៅសុំការអនុញ្ញាតពីព្រះរាជអាជ្ញាជាមុនសិន ។

ពាក់ព័ន្ធនឹងបញ្ហានេះ នៅថ្ងៃទី១៥ ខែមីនានេះ អ្នកនាំពាក្យក្រសួងយុត្តិធម៌ លោក ជិន ម៉ាលីន បានផ្តល់ជាយោបល់ផ្នែកច្បាប់មួយចំនួនក្នុងការឆ្លើយតបទៅនឹងសេចក្តីថ្លែងការណ៍របស់សហមេធាវីលោក កឹម សុខា។ លោក ជិន ម៉ាលីន បានបញ្ជាក់ថា «បើគ្រាន់តែសុំការអនុញ្ញាតពីព្រះរាជអាជ្ញាបន្តិចទៅ ដូចជាមិនទាស់ខុសអីទេ ព្រោះវាតម្រូវដោយលក្ខខណ្ឌកំណត់ក្នុងសាលក្រមតុលាការដែលមានអំណាចតាមផ្លូវច្បាប់។ ប្រសិនបើព្រះរាជអាជ្ញាមិនអនុញ្ញាត នោះទើបជាការរំលោភបំពានសិទ្ធិមេធាវីក្នុងការជួបជាមួយកូនក្តី»។

អ្នកនាំពាក្យរូបនេះ បានសង្កត់ធ្ងន់ថា សូម្បីតែចូលជួបកូនក្តីខ្លួនក្នុងពន្ធធនាគារ ក៏ត្រូវតែសុំការអនុញ្ញាតពីអ្នកគ្រប់គ្រងពន្ធនាគារដែរ។ ដូច្នេះប្រសិនបើមានចេតនាជួបជាមួយកូនក្តីពិតប្រាកដមែន គ្រាន់តែស្នើសុំបន្តិចទៅ ដូចជាមិនអីទេ លើកលែងតែមានចេតនាផ្សេងពីនេះ៕

ដោយ៖ ធឿន វ៉ាន់សុង