សម្ដេចតេជោ ៖ បើអ្នកឯងមិនបានបោះឆ្នោតថ្ងៃទី ២៣ កក្កដា ២០២៣ទេ អ្នកឯងគ្មានសិទ្ធិឈរឈ្មោះឲ្យគេបោះឆ្នោតឲ្យទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា នៅពេលខាងមុខ នឹងមានការធ្វើវិសោ​ធនកម្មច្បាប់ ស្ដីពី ការបោះឆ្នោត ទាក់ទងទៅលើសិទ្ធិឈរឈ្មោះឲ្យគេបោះឆ្នោតឲ្យ ដែលអាចយកតាមរបៀបប្រទេសថៃ។

ការថ្លែងរបស់សម្ដេចតេជោ ហ៊ុន សែន បានធ្វើឡើងក្នុងពិធីជួបសំណេះសំណាលជាមួយកម្មករ-កម្មការិនីជិត ២ម៉ឺននាក់ មកពីរោងចក្រ-សហគ្រាសចំនួន ១១ នៅក្នុងខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី ១៣ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបន្តថា «ពេលដែលយើងចាប់ផ្ដើមធ្វើវិសោធនកម្មច្បាប់បោះឆ្នោត នៅពេលខាងមុខ ត្រូវធ្វើការកែទម្រង់នៃសិទ្ធិឈរឈ្មោះឲ្យគេបោះឆ្នោត យើងយកតាមបែបរបស់ថៃ ថៃឥឡូវនេះទោះបីព័ត៌មានមិនទាន់ផ្លូវការក៏ដោយ តែមានគណបក្សនយោបាយមួយបាត់បង់តំណាងរាស្រ្ដអស់ ១៨នាក់ មូលហេតុអីបានជាបាត់បង់តំណាងរាស្រ្ដអស់ ១៨នាក់ មូលហេតុដោយតំណាងរាស្រ្ដរូបនោះ មិនបានបោះឆ្នោតលើកទី ១ អត់បានបោះឆ្នោតលើកមុន គេកំណត់យ៉ាងដូច្នេះ អត់បានបោះឆ្នោត»។

សម្ដេចតេជោ ហ៊ុន សែន ថ្លែងបញ្ជាក់ថា ប្រសិនបើអ្នកណា មិនបានបោះឆ្នោតនៅថ្ងៃទី ២៣ ខែកក្កដា ឆ្នាំ ២០២៣ទេ គឺអ្នកនោះគ្មានសិទ្ធិឈរឈ្មោះឲ្យគេបោះឆ្នោតឲ្យឡើយ។

សម្ដេចតេជោ ហ៊ុន សែន ថ្លែងបែបនេះថា «សម្រាប់ការបោះឆ្នោតទាំងអស់ ដែលឥឡូវនេះសម្ដេចក្រឡាហោម ស ខេង ឯកឧត្ដម កើត រិទ្ធ កំពុងធ្វើ ដែលខ្ញុំចេញសារដើម្បីវ៉ៃអ្នកឯងឲ្យចំកញ្ចប់មាត់ ហើយវ៉ៃផ្ដាច់ព្រាត់តែម្ដង គឺនៅត្រង់ថា បើអ្នកឯងមិនបានបោះឆ្នោតថ្ងៃ ២៣ ខែកក្កដា ឆ្នាំ ២០២៣ អ្នកឯងគ្មានសិទ្ធិឈរឈ្មោះឲ្យគេបោះឆ្នោត សម្រាប់តំណែងក្រុមប្រឹក្សាឃុំ-សង្កាត់ តំណែងក្រុមប្រឹក្សាស្រុក ខណ្ឌ ក្រុង ខេត្ត រាជធានី សម្រាប់តំណែងសមាជិកព្រឹទ្ធសភា និងតំណែងសមាជិករដ្ឋសភា នៅឆ្នាំ ២០២៨»៕