នយោបាយ

សម្ដេចតេជោថាការស្ទង់មតិរបស់ថៃកាន់តែបង្ហាញពីភាពត្រឹមត្រូវរបស់សម្ដេចចំពោះកម្ពុជា

បានផុស

១២ ខែ មុន

នៅ

ថ្ងៃពុធ ៩ កក្កដា ២០២៥

ដោយ

ប្រធានព្រឹទ្ធសភា សម្ដេចតេជោ ហ៊ុន សែន បានចាត់ទុកជារឿងដ៏ចម្លែក និងកម្រណាស់នៅលើពិភពលោកដែលក្នុងពេលដែលប្រទេសប្រឈមមុខដាក់គ្នា បែរជានាំគ្នាធ្វើការស្ទង់មតិចំពោះមេដឹកនាំប្រទេសមួយទៀត ហើយមានតែ«ថៃ»ទេដែលអាចធ្វើរឿងបែបនេះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសារបង្ហោះនៅរសៀលថ្ងៃទី៩ ខែកក្កដា ឆ្នាំ២០២៥នេះ សម្ដេចតេជោ ហ៊ុន សែន ចាត់ទុកជារឿងដែលគួរឱ្យអស់សំណើចដែលវិទ្យាស្ថាន NIDA របស់ថៃទៅធ្វើការស្ទង់មតិពីទឹកចិត្តពលរដ្ឋថៃចំពោះសម្ដេច។ សម្ដេចថាក្នុងពេលដែលប្រឈមមុខគ្នាជាមួយកម្ពុជាគួរណាស់ថៃនាំគ្នស្ទង់មតិមេដឹកនាំខ្លួនឯងវិញទៅ។

សម្ដេចបានផ្ញើសារទូន្មានថា៖ «អ្វីដែលខ្ញុំខ្លាចបំផុតនោះគឺ ប្រជាជនថៃស្រឡាញ់ ហ៊ុន សែន ដែលអាចបង្ហាញពីខ្ញុំក្បត់ជាតិសាសន៍ និងប្រជាជនរបស់ខ្ញុំ ប៉ុន្តែអ្វីដែលខ្ញុំចង់បានបំផុតនោះគឺសត្រូវវាយតម្លៃ ហ៊ុន សែន ក្នុងកម្រិតទាបបំផុត ដែលចំណុចនេះបង្ហាញថា ខ្ញុំកំពុងធ្វើរឿងដ៏ត្រឹមត្រូវចំពោះប្រទេសជាតិ និងប្រជាជនរបស់ខ្ញុំ»។

កាលពីដើមសប្ដាហ៍នេះវិទ្យាស្ថានជាតិសម្រាប់ការអភិវឌ្ឍន៍រដ្ឋបាលរបស់ថៃបានចេញរបាយការណ៍ស្ទង់មតិមួយដែលបានសម្ភាសន៍មនុស្ស ១៣១០នាក់ទូទាំងប្រទេសអំពីបុរសខ្លាំងកម្ពុជា សម្ដេចតេជោ ហ៊ុន សែន ដែលជាលទ្ធផលបង្ហាញថាជិត៦០%ថាសម្ដេចតេជោមិនគួរឱ្យទុកចិត្ត និងជាង៣៤%ថាសម្ដេចបានធ្វើការទស្សទាយដោយគ្មានហេតុផលចំពោះការផ្លាស់ប្ដូរនៅក្នុងប្រទេសថៃ។

អ្នកនាំពាក្យគណបក្សប្រជាជនកម្ពុជា និងព្រឹទ្ធសភា លោក ជា ធីរិទ្ធ បានចាត់ទុកការស្ទង់មតិនេះជារឿងគួរឱ្យអស់សំណើច និងរឿងអាម៉ាស់របស់ថៃទៅវិញទេ ព្រោះជារឿងធម្មតាទេដែល «សត្រូវ» មិនពេញចិត្តថ្នាក់ដឹកនាំកម្ពុជា។

លោកបន្ថែមថា៖ «គឺជាល្បែងកូនក្មេង ហើយប្រហែលជារកលេសវាយប្រហារលើសម្ដេចតេជោលែងបានហើយបានឱ្យប្រជាជនមកធ្វើការស្ទង់មតិវាយប្រហារលើសម្ដេចតេជោវាជារឿងមួយគួរឱ្យអស់សំណើចជាទីបំផុតហើយជារឿងមួយដែលគួរឱ្យអាម៉ាស់ទៅវិញទេសម្រាប់ប្រជាជនដែលធ្វើការស្ទង់មតិលើសម្ដេចតេជោនោះ»។

លោក ជា ធីរិទ្ធ ថាវាមិនសំខាន់ទេត្រង់ថៃមិនពេញចិត្តថ្នាក់ដឹកនាំកម្ពុជា ព្រោះថ្នាក់ដឹកនាំកម្ពុជាកំពុងធ្វើការដើម្បីជាតិ ប្រជាជនខ្មែរ មិនមែនថៃនោះទេ។

កាលពីថ្ងៃទី១៨ ខែមិថុនា វិទ្យាស្ថានចក្ខុវិស័យអាស៊ី (AVI) បានចេញរបាយការណ៍ស្ទង់មតិមួយដែលបានបង្ហាញថាប្រជាជនកម្ពុជាច្រើនលើសលប់ដល់ជាង៩៣,៦% បានបង្ហាញការពេញចិត្តចំពោះចំណាត់ការទូទៅរបស់ រាជរដ្ឋាភិបាលកម្ពុជាក្នុងការដោះស្រាយជម្លោះព្រំដែនកម្ពុជា-ថៃ៕