មន្ត្រីទូតកម្ពុជាលើកឡើងពីក្ដីបារម្ភចំពោះភាពផុយស្រួយក្នុងជម្លោះព្រំដែនកម្ពុជា-ថៃ ទៅកាន់ហ្វ្រង់កូហ្វូនី

កម្ពុជាបានលើកឡើងពីក្ដីបារម្ភចំពោះស្ថានភាពនៅតាមបណ្ដោយព្រំដែនកម្ពុជា និងថៃ ដែលកម្ពុជាអះអាងថា នៅតែមានភាពផុយស្រួយ ទោះបីមានបទឈប់បាញ់តាំងពីខែធ្នូ ឆ្នាំ២០២៥ក៏ដោយ ដោយភាគីថៃបានរំលោភបំពានជាបន្តបន្ទាប់លើអធិបតេយ្យភាព និងបូរណភាពទឹកដីរបស់កម្ពុជា។

ការលើកឡើងនេះបានធ្វើឡើងដោយលោក លុយ ដាវីត ឯកអគ្គរាជទូតកម្ពុជាប្រចាំប្រទេសបារាំង ក្នុងកិច្ចប្រជុំមួយរបស់ក្រុមប្រឹក្សាអចិន្ត្រៃយ៍ហ្វ្រង់កូហ្វូនី កាលពីថ្ងៃទី១ ខែកក្កដា ឆ្នាំ២០២៦ នៅទីក្រុងប៉ារីស ដែលកិច្ចប្រជុំដឹកនាំដោយលោកស្រី Louise Mushikiwabo អគ្គលេខាធិការអង្គការអន្តរជាតិនៃក្រុមប្រទេសនិយាយភាសាបារាំង (ហ្រ្វង់កូហ្វូនី)។

លោកបានរាយការណ៍អំពីបច្ចុប្បន្នភាពនៃស្ថានភាពនៅតាមបណ្តាយព្រំដែនកម្ពុជា និងថៃ ដោយលើកឡើងពីសកម្មភាពខុសច្បាប់របស់ថៃ ដូចជាការបន្តរារាំងការវិលត្រឡប់របស់ជនស៊ីវិលកម្ពុជាទៅកាន់លំនៅឋាននៅតាមតំបន់ព្រំដែន បន្តកាន់កាប់ដោយខុសច្បាប់លើទឹកដីកម្ពុជា ពិសេសការព្យាយាមកែប្រែខ្សែបន្ទាត់ព្រំដែនដោយឯកតោភាគី។

ប៉ុន្តែលោក លុយ ដាវីត បានគូសបញ្ជាក់ថា កម្ពុជាមិនទទួលស្គាល់ជាដាច់ខាតនូវការផ្លាស់ប្តូរខ្សែបន្ទាត់ព្រំដែនណាមួយ ដោយការប្រើប្រាស់កងកម្លាំង ឬការបង្កើតស្ថានភាពជាក់ស្តែងឡើយ។ ពីកិច្ចប្រជុំនោះ លោក ក៏បានអរគុណចំពោះលោកស្រីអគ្គលេខាធិការអង្គការហ្វ្រង់កូហ្វូនី ដែលបានចុះសួរសុខទុក្ខផ្ទាល់ដល់ជនភៀសខ្លួនកម្ពុជា កាលពីខែមីនាកន្លងទៅ។ «នេះជាកាយវិការដែលបង្ហាញពីសាមគ្គីភាពរបស់ហ្វ្រង់កូហ្វូនី»។ លោក លុយ ដាវីត លើកឡើងដូច្នេះ។

ពាក់ព័ន្ធនឹងបញ្ហាព្រំដែនសមុទ្រ មន្រ្តីទូតកម្ពុជារូបនេះ បានប្រាប់ហ្វ្រង់កូហ្វូនី ថា បន្ទាប់ពីការដកខ្លួនជាឯកតោភាគីរបស់ថៃចេញពីអនុស្សរណៈនៃការយោគយល់ឆ្នាំ២០០១នោះ កម្ពុជាបានចាប់ផ្តើមនីតិវិធីផ្សះផ្សាដោយបង្ខំ ក្រោមអនុសញ្ញាសហប្រជាជាតិស្តីពីច្បាប់សមុទ្រ (UNCLOS) ដើម្បីឈានទៅរកដំណោះស្រាយយុត្តិធម៌ សមធម៌ និងយូរអង្វែង ស្របតាមច្បាប់អន្តរជាតិ៕

ដោយ៖ ធឿន វ៉ាន់សុង