ស្ដ្រីលក់ណែម​ដាច់ចិត្ត​ចាកចេញពីស្រុក​មកប្រកបរបរ​នៅភ្នំពេញ​រកប្រាក់​បាន១០ម៉ឺន​រៀល​ក្នុង​មួយថ្ងៃ

ស្ត្រីម្នាក់សម្រេចចិត្តចាកចេញពីស្រុកកំណើត​នាំទាំងកូនតូចៗ​ ៣នាក់មករស់នៅផ្ទះជួល​ប្រកបរបរ​លក់ណែមចំណេញបានប្រាក់ជាមធ្យម ១០ ម៉ឺនរៀលជារៀងរាល់ថ្ងៃ។

​តាមការរៀបរាប់​ពីស្រ្តីខាងលើ​ឈ្មោះ ស្រី នាង អាយុ៣៥ឆ្នាំ មានស្រុកកំណើតនៅភូមិស្លរក្រាម​ ឃុំ​វត្ត​តាមឹម​ ស្រុកសង្កែ ​ខេត្តបាត់ដំបង​បានឲ្យដឹងថា​ រូបនាង​បានចាកចេញ​ពីស្រុកកំណើត​អស់​រយៈ​ពេល​​ជាច្រើនឆ្នាំមកហើយដោយ​រស់នៅផ្ទះជួលម្តុំច្រាំងបាក់​ សង្កាត់ច្បារអំពៅទី២ ខណ្ឌច្បារ​អំពៅ ​រាជធានីភ្នំពេញ​ដោយប្រកបរបរលក់ណែមបោះដុំ ដែលណែម​នេះគឺជាណែម​ឆ្ងាញ់ខេត្តបាត់​ដំបង។

ស្រី នាង បានបញ្ជាក់ថា ចំពោះណែមដែលប្អូនស្រីលក់រាល់ថ្ងៃគឺស្ថិតនៅ​ខាងជើងជាប់​គល់ស្ពាន​ព្រះមុនីវង្សចាស់ដោយចាប់លក់ពីម៉ោង ៦ ព្រឹកដល់ ៧យប់។​ ចំពោះតម្លៃបោះដុំវិញគឺណែមប្រភេទលេខ១ មួយរយគ្រាប់ថ្លៃ១០ម៉ឺនរៀល។ លេខ២ថ្លៃ៩ ម៉ឺន​ចំនួន ១០០គ្រាប់ឯលេខ៣គឺថ្លៃ ៧ ម៉ឺនរៀលក្នុង១០០គ្រាប់។

​ស្រី នាង បន្ថែមទៀតថា ​ចំពោះប្រាក់ចំណេញ​ជាប្រចាំគឺទទួលបាន ១០ ម៉ឺនរៀលជាមធ្យម រាល់ថ្ងៃ​ទៀត​ផង។​ ហើយប្អូនស្រីក៏ដឹងគុណដល់ម៉ូយដែលចុះមកទិញរាល់ថ្ងៃធ្វើឲ្យប្អូនស្រីមានលទ្ធភាពចិញ្ចឹមកូនតូចៗ៣នាក់៕

អត្ថបទ៖ នរា