«​ជ្រូកកណ្ដុរ​» ស្រួលចិញ្ចឹម​ចំណាយ​ទុនតិច​ចំណេញ​ច្រើន​លក់ដាច់​ខ្លាំង​ក្នុងរដូវ​ចូលឆ្នាំចិន​

ជ្រូក​ក​កណ្ដុរ គឺជា​ប្រភេទ​សត្វដែល​មាន​ទំហំ​តូច​ជាង​ជ្រូក​ធម្មតា តែក៏មានមេពូជ​ទម្ងន់ធ្ងន់រហូតដល់ ៦០ គីឡូក្រាមដែរ។

​តាមរយៈបទសម្ភាសន៍ជាមួយកម្ពុជាថ្មី ​នៅថ្ងៃទី ៥ ខែកក្កដា ឆ្នាំ២០២២ កសិករចិញ្ចឹមជ្រូកកណ្ដុរ ឈ្មោះ នី ស្រស់ រស់​នៅស្រុក​សំឡូត ខេត្តបាត់ដំបង ប្រាប់ថា នាងបានចាប់របរចិញ្ចឹមជ្រូកកណ្ដុររយៈពេល ៣ ឆ្នាំ មកហើយ តាមរយៈបង​ប្រុសរបស់ខ្លួន ដែលទៅធ្វើការនៅប្រទេសថៃ ហើយឃើញថៃចិញ្ចឹមជោគជ័យ គាត់ក៏​សុំពូជ​គេយកមកចិញ្ចឹម ទទួល​បានជោគជ័យលក់​ដាច់ខ្លាំង​នៅរដូវបុណ្យ​ចូលឆ្នាំចិន។

អ្នកចិញ្ចឹមជ្រូកកណ្ដុររូបនេះប្រាប់ថា បច្ចុប្បន្ននាងមានជ្រូកកណ្ដុរប្រមាណ ១០០ ក្បាល​ចិញ្ចឹម​លក្ខណៈគ្រួសារ នៅក្នុងភូមិកោះ ស្រុកសំឡូត ខេត្តបាត់ដំបង។ ការចិញ្ចឹម​ជ្រូកកណ្ដុរ គឺងាយ​ស្រួលចិញ្ចឹម មិនពិបាកដូចចិញ្ចឹមជ្រូកក្នុងស្រុក ​ហើយលក់ដាច់ខ្លាំង និងចំណេញច្រើន នៅរដូវ​បុណ្យទានជាពិសេស​​សែនចូលឆ្នាំចិន និងឆេងម៉េង។

កញ្ញា នី ស្រស់ បានបន្ថែមថា «ជ្រូកកណ្ដុរ វាស៊ីដូចសត្វពពែ ព្រោះអីវាស៊ីបន្លែ យើងមិន​បាច់ចំ​ណាយ​លុយទិញចំណី កន្ទក់ទេ យើងមានតែដើមចេក ស្វាយទុំ គឺវាស៊ីហើយ វាស្រួលចិញ្ចឹមណាស់ អ្នកដើមតិចទិញ​យកជ្រូក​ទៅចិញ្ចឹមក៏គាត់អាចចំណេញបានច្រើនដែរឱ្យតែគាត់ខំព្យាយាម»។

អ្នកចិញ្ចឹមជ្រូករូបនេះ បញ្ចាក់ឱ្យដឹងថា បច្ចុប្បន្ន​ខ្លួនចិញ្ចឹមផ្គត់ផ្គង់នៅក្នុងមូលដ្ឋាន ​ប៉ុន្តែ​នៅពេល​ដែលមានការបញ្ជាទិញច្រើន ខ្លួនត្រូវនាំចូលមកពីប្រទេសថៃ ដើម្បីផ្គត់ផ្គង់តម្រូវការ ដោយសារ​តែជ្រូកប្រភេទនេះ មានរសជាតិឆ្ងាញ់នៅពេលដែលគេយកទៅខ្វៃ។

​ចំពោះបច្ចេកទេសចិញ្ចឹម​ អ្នកចិញ្ចឹមរូបនេះ​ បញ្ជាក់ប្រាប់ថា​ ទ្រុងមិនពិបាកធ្វើដូចជ្រូកខ្មែរទេ​ យើង​មានតែសំណាញ់ព័ទ្ធចាក់សាប ឬមិនបាច់ចាក់សាបក៏បាន ដោយសារជ្រូកប្រភេទនេះ វាស៊ាំនឹង​កាសធាតុក្ដៅក៏បានត្រជាក់ក៏បាន។ ហើយការផ្ដល់ចំណី គឺមានបន្លែស្ពៃក្ដោប ចេក និងស្វាយទំ ដោយឱ្យ១ថ្ងៃ ៣ ពេល ព្រឹក ថ្ងៃ ល្ងាច ដោយចាប់ពីកូនរហូតដល់​ធំត្រូវចំណាយ​ពេលប្រមាណ៣ ខែ ឬតិចជាងនេះ ប្រសិនបើយើងផ្ដល់ចំណីដិតដល់។

សម្រាប់តម្លៃមានទៅតាមប្រភេទជ្រូក ​គឺកូនជ្រូកទម្ងន់ ៤ ទៅ ៥ គីឡូតម្លៃ ២៧ ម៉ឺនរៀល ចំណែកឯកប្រភេទទម្ងន់ ៦ ដល់ ៩ គីឡូ តម្លៃ ៣៣ ម៉ឺនរៀល រីឯទម្ងន់ ១០ ដល់ ១៥ គីឡូ តម្លៃ ១០០ ដុល្លារ។ កសិកររូបនេះ ឱ្យដឹងថា នាងលក់ដាច់ភាគច្រើនតែកូនតូចៗ តម្លៃ ២៧ ម៉ឺនរៀល ដែលគេមានតម្រូវការខ្វៃនារដូវសែនចូលឆ្នាំចិន។

ទោះជាយ៉ាងណា កសិករូបនេះ បញ្ជាក់ថា ​នាងក៏មានបញ្ហាប្រឈមមួយចំនួនដែរ ដូចជាមិន​សូវ​មាន​ទីផ្សារនារដូវខ្លះ ប៉ុន្តែអ្នកស្រីលើកទឹកចិត្ត​ដល់អ្នកដែលចង់មានរបរច្រើន ​អាចពិចារណាលើ​ការចិញ្ចឹម​ជ្រូកកណ្ដុរ​ព្រោះជាជ្រូកងាយស្រួលចិញ្ចឹមជាងជ្រូកស្រុក ៥០% ចំណាយដើមទុនតិច ហើយចំណេញច្រើន៕

អត្ថបទ៖​ ឡេង ដេត