សន្តិសុខសង្គម

ឮថាមានអគ្គិភ័យ មនុស្សប្រុស-ស្រី ៤ នាក់ ភ័យស្លន់ស្លោលោតពីបន្ទប់ជួលជាន់ទី ២ ចុះមកក្រោម ស្លាប់ ១ របួស ៣ នៅខណ្ឌច្បារអំពៅ

បានផុស

៨ ខែ មុន

នៅ

ថ្ងៃសៅរ៍ ២៥ តុលា ២០២៥

ដោយ

ឆាបឆេះម៉ូតូទុកនៅជាន់ក្រោមយ៉ាងសន្ធោសន្ធៅ ផ្អើលដល់អ្នកជួលបន្ទប់ជាន់ទី ២ ភ័យស្លន់ស្លោ នាំគ្នាលោតចុះមកក្រោម បណ្ដាលឲ្យស្ត្រី ១ នាក់ស្លាប់ និងមនុស្សប្រុស-ស្រី ៣ នាក់ទៀត របួសធ្ងន់-ស្រាល បញ្ជូនទៅមន្ទីរពេទ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៩ និង ១០ នាទីយប់ ថ្ងៃទី ២៤ ខែតុលា ឆ្នាំ ២០២៥ នៅចំណុចផ្ទះជួល ១ កន្លែង ក្រោយប៉ុស្តិ៍នគរបាលរដ្ឋបាលនិរោធ សង្កាត់និរោធ ខណ្ឌច្បារអំពៅ រាជធានីភ្នំពេញ។ សពស្ត្រីរងគ្រោះឈ្មោះ ចាន់ គា ភេទស្រី អាយុ ៣៧ ឆ្នាំ មុខរបរលក់ដូរនៅសាលាឯកជន ស្នាក់នៅបន្ទប់ជួលជាន់ទី ២ និងមានស្រុកកំណើតនៅស្រុកកំពង់រោទិ៍ ខេត្តស្វាយរៀង។

តាមប្រភពពីប្រជាពលរដ្ឋបានឲ្យដឹងថា មុនកើតហេតុ ពួកគាត់មិនដឹងថាមានរឿងអ្វីកើតឡើងនោះទេ ស្រាប់តែមានភ្លើងឆាបឆេះយ៉ាងសន្ធោសន្ធៅ ហុយផ្សែងខ្មួលខ្មាញ់ ចេញពីជាន់ផ្ទាល់ដី ដែលជាកន្លែងទុកម៉ូតូ។

ប្រភពដដែលបន្តថា ដោយសារតែឃើញមានភ្លើង និងផ្សែងខ្មួលខ្មាញ់ឡើងទៅដល់ជាន់ខាងលើ ខ្លាំងទៅៗ អ្នករស់នៅទីនោះមានការភ័យស្លន់ស្លោ ក៏មានមនុស្សប្រុស-ស្រី ៤ នាក់ ក្នុងនោះ ប្រុសម្នាក់ បាននាំគ្នីគ្នាលោតចុះមកដល់ជាន់ក្រោម បណ្ដាលឲ្យស្ត្រីម្នាក់ ១ នាក់ វ័យជិត ៤០ ឆ្នាំ បោកក្បាលហូរឈាមស្លាប់ភ្លាមៗ។ ចំណែកប្រុស-ស្រី ៣ នាក់ទៀត ត្រូវបានបញ្ជូនតាមរថយន្តសាមុយរបស់មន្ទីរពេទ្យច្បារអំពៅដឹកយកទៅសង្គ្រោះបន្ទាន់ផងដែរ។

អគ្គិភ័យនេះឆាបឆេះខូចខាតអស់ម៉ូតូចំនួន ៤ គ្រឿង និងឆេះជញ្ជាំងអស់ ១ ចំនួន ព្រមទាំងធ្វើឲ្យមានអ្នករងរបួសធ្ងន់-ស្រាល ៣ នាក់ និងស្លាប់ស្ត្រីម្នាក់ផងដែរ។ ក្នុងនោះ ប្រើប្រាស់រថយន្តពន្លត់អគ្គិភ័យ បុរី ប៉េង ហួត ១ គ្រឿង បាញ់ឲ្យរលត់ទៅវិញជាស្ថាពរ និងមិនបង្កឲ្យរាលដាលដល់ផ្ទះក្បែរខាងផ្សេងទៀតនោះឡើយ។ ចំពោះមូលហេតុយោងតាមកាមេរ៉ាសុវត្ថិភាពប្រជាពលរដ្ឋ បានបញ្ជាក់ថា សង្ស័យឆ្លងចរន្តឆេះចេញពីម៉ូតូ ទើបបណ្ដាលឲ្យកើតជាអគ្គិភ័យបែបនេះ។

បច្ចុប្បន្ន សពស្ត្រីរងគ្រោះ ត្រូវបានសមត្ថកិច្ចទាក់ទងសាច់ញាតិឲ្យមកទទួលយកទៅធ្វើបុណ្យតាមប្រពៃណី៕

អត្ថបទ ៖ រដ្ឋា