សន្តិសុខសង្គម

សាកថ្មពិលទុកចោល សង្ស័យផ្ទុះបង្កជាភ្លើងឆេះផ្ទះ ២ ខ្នង ទាំងកណ្តាលថ្ងៃ

បានផុស

៩ ខែ មុន

នៅ

ថ្ងៃព្រហស្បតិ៍ ៩ ធ្នូ ២០២១

ដោយ

ផ្ទះ ២ ខ្នង ត្រូវអណ្តាតភ្លើងឆាបឆេះគ្មានសល់ និងខ្ទេចខ្ទីទ្រព្យសម្បត្តិមួយចំនួន ដែលបញ្ហានេះត្រូវបានម្ចាស់ផ្ទះសារភាពថា អាចបណ្តាលមកពីគាត់ដាក់សាកថ្មពិលទុកចោលយូរពេក ទើបអាចផ្ទុះនិងបង្កជាភ្លើងបែបនេះ។ ហេតុការណ៍នេះ បានកើតឡើងនៅថ្ងៃទី ០៩ ខែធ្នូ ឆ្នាំ ២០២១ នៅវេលាម៉ោង ១ និង ៤០ នាទី រសៀល ស្ថិតនៅចំណុចក្រុមទី ០៧ ភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក គឹម ប៊ុនធឿន នាយការិយាល័យបង្ការ ពន្លត់អគ្គិភ័យ បានបញ្ជាក់ថា ករណីនេះបណ្តាលឲ្យឆេះផ្ទះប្រជាពលរដ្ឋចំនួន ០២ខ្នង (ឆេះទាំងស្រុង ០១ខ្នង,ឆេះរោល ០១ខ្នង) គឺ១.ឆេះផ្ទះទំហំ ៣មx៤ម (ឆេះទាំងស្រុង) ធ្វើពីឈើប្រក់ស័ង្កសី របស់ម្ចាស់ឈ្មោះ សំ ឈឿន ភេទប្រុស អាយុ ២៣ ឆ្នាំ រស់នៅក្នុងភូមិ សង្កាត់កើតហេតុខាងលើ សរុបគិតជាទឹកប្រាក់អស់ប្រហែល ១,០០០ ដុល្លារ ( មួយពាន់ដុល្លារ) មូលហេតុ៖ បណ្តាលមកពីការធ្វេសប្រហែស(សាកថ្មពិលទុកចោលម្ចាស់មិននៅផ្ទះ)។ ២. ឆេះផ្ទះទំហំ ៣.៥មx ១៣ម(ឆេះរោលផ្នែកខាងក្រោយ) ធ្វើពីថ្មក្រោម ដំបូលប្រក់ស័ង្កសី របស់ម្ចាស់ឈ្មោះ ពេជ្រ សុភក្រ័ ភេទប្រុស អាយុ ៣៧ ឆ្នាំ រស់នៅក្នុងភូមិ សង្កាត់កើតហេតុខាងលើសម្ភារៈ ខូចខាតសរុបគិតជាទឹកប្រាក់អស់ប្រហែល ១,៥០០ ដុល្លារ(មួយពាន់ប្រាំរយដុល្លារ)។

ភ្លាមៗនោះ កម្លាំងការិយាល័យបានចេញរថយន្តពន្លត់អគ្គិភ័យចំនួន ០៣គ្រឿង ដើម្បីបាញ់ការពារនិងទប់ស្កាត់កុំឲ្យរាលដាលទៅផ្ទះដទៃ ដោយគ្រប់គ្រងសភាពការណ៍បាននៅវេលាម៉ោង ២ និង ២០នាទីរសៀល នាថ្ងៃ ខែ ឆ្នាំដដែល៕

អត្ថបទ៖ សោ និយមរ័ត្ន