​អាជ្ញាធរ​សង្កាត់ព្រែកប្រា​ចុះរុះរើទីតាំង​ជនបែកថ្នាំ​ដេកតាមច្រាំងទន្លេ​

កម្លាំងចម្រុះរបស់គណបញ្ជាការឯកភាព​សង្កាត់ព្រែកប្រានៅថ្ងៃទី ១៣ ខែកក្កដា​នេះបានចុះទៅរុះរើ​ទីតាំងជម្រកដែលភាគច្រើនជាជនអានាថា និងជនបែកថ្នាំដែលតែងតែស្នាក់នៅតាម​មាត់ច្រាំងទន្លេ និងដីឡូត៍ដែលពុំមានម្ចាស់រស់នៅ។

​យោងតាមប្រភពពីលោកវរសេនីយ៍ត្រី ស្វាយ ដារ៉ា នាយនគរបាលប៉ុស្តិ៍ព្រែកប្រាបានប្រាប់កម្ពុជាថ្មីថា ការចុះរុះរើទីតាំងជម្រកស្នាក់នៅរបស់ជនអានាថាក៏ដូចជាជនបែកថ្នាំនេះគឺយោងតាមសំណូមពររបស់បងប្អូនប្រជាពលរដ្ឋក្នុងមូលដ្ឋានសង្កាត់ព្រែកប្រាតែម្តង។

ព្រោះតែលោកព្រួយបារម្មណ៍ពីសុខសុវត្ថិភាពនឹងពិសេសជនបែកថ្នាំតែងបង្កជាអំពើហឹង្សារហូតដល់ដុតភ្លើងបង្កឲ្យឆេះរាលដាលដល់លំនៅដ្ឋានប្រជាពលរដ្ឋ។ ហើយជាក់ស្តែងនាថ្ងៃនេះគឺកម្លាំងចម្រុះបានចុះទៅរុះរើទីតាំងស្នាក់នៅរបស់ជនបែកថ្នាំមួយកន្លែងនៅមាត់ច្រាំងទន្លេបាសាក់ស្ថិតក្នុងដីឡូត៍គ្មានលេខផ្លូវ៣៦៩ភូមិព្រះពន្លា សង្កាត់ព្រែកប្រាខណ្ឌច្បារអំពៅរាជធានីភ្នំពេញដោយរកឃើញ ពូកចាស់ៗនឹងខ្នើយដេករួមទាំងចានឆ្នាំង។

​លោកនាយប៉ុស្តិបញ្ជាក់ថា​ លោកនឹងបន្តរុះរើទីតាំងជម្រករបស់​ជនអានាថា​និងជនបែកថ្នាំ​ជាបន្តឲ្យ​ទាល់តែអស់។ ចំពោះបុគ្គលបែក ថ្នាំនឹងជនអានាថារងចាំមន្ត្រីសង្គម​កិច្ចមកដឹកយកទៅ​អប់រំនៅ​មន្ទីរសង្គមកិច្ចផងដែរ។ ​ព្រោះបើពុំធ្វើបែបនេះគឺជនពាក់ពន្ធ័ខាង​លើនឹងបង្កភាពអានាធិបតេយ្យ​ពេញមូលដ្ឋានជាក់ជាមិនខាន៕

អត្ថបទ៖ នរា