អាជ្ញាធររកឃើញ​សពបុរស​រអិលជើងធ្លាក់​ចូលចរន្តទឹកហូរ​

​បន្ទាប់ពីមានករណីបុរសអ្នកបងសំណាញ់ម្នាក់បានរអិលជើងធ្លាក់ទឹកបាត់ខ្លួននៅ ទំនប់បារាំង​ក្នុងភូមិ​កណ្ដាល សង្កាត់ផ្សារឆ្នាំងក្រុងកំពង់ឆ្នាំង កាលពីយប់ថ្ងៃទី១៨ ខែកក្កដាមក នៅថ្ងៃទី​១៩ ខែ កក្កដានេះ ក្រុមការងារចម្រុះចុះមុជរាវរក សពជនរងគ្រោះ ដែលបានរអិលជើងធ្លាក់ទឹក​នៅចំណុច​មុខទឹក​ហូរកួចខ្លាំងទំនប់បារាំងកន្លែងកើតហេតុខាងលើ។

ប្រភពព័ត៌មានពីក្រុមការងារបានឱ្យដឹងថា ការចុះមុជទឹកគឺប្រើម៉ាស៊ីនខ្យល់មុជរាវរក ដោយបាន​ដំណើរការតាំងពីម៉ោងប្រមាណ ៧ព្រឹក រហូតដល់ម៉ោង ៤ ល្ងាច ក្នុងនោះកាណូត​របស់អ្នក​មុជ​ទឹក២ គ្រឿង បានក្រឡាប់លិចផងដែរនៅពេលធ្វើសកម្មភាព ក្នុងចរន្តទឹកហូរកួចខ្លាំងប៉ុន្តែអ្នក​ជំនាញ​ទាំងនោះសុទ្ធតែចេះហែលទឹក ពុំមានគ្រោះថ្នាក់នោះឡើយ ហើយក៏ពុំបានរាវ​រកឃើញ​សពជនរងគ្រោះឡើយ។

រហូតដល់ម៉ោង ១៦ និង ៤០ នាទីល្ងាច ទើបសាឡាងដរទទឹងបានប្រទះឃើញ​សពជនរងគ្រោះ​បានអណ្ដែតទឹកនៅចុងភូមិចុងកោះហួ សចំណតសាឡាងដរ កំពង់ឆ្នាំង កំពង់លែងដែលមាន​ចម្ងាយ​ជិត២ គីឡូម៉ែត្រពីទំនប់បារាំងកន្លែងកើតហេតុ។

ប្រភពពីក្រុមការងារបានឱ្យដឹងទៀតថាបុរសរងគ្រោះមាន ឈ្មោះ អួន អា យុ៣៤ឆ្នាំ មានទីលំនៅក្នុងភូមិចំការ តាម៉ៅ ឃុំស្រែថ្មី ស្រុករលាប្អៀរ មុនពេលមកបង់សំណាញ់ រូបគាត់បានហូបស្រារួចកងមកបង់សំណាញ់នៅខ្នងទំនប់បារាំង វេលាម៉ោងជាង ៨ យប់ ចៃដន្យក៏ជួបនឹងគ្រោះថ្នាក់រអិលជើងធ្លាក់ទឹកលង់ស្លាប់តែម្ដង។

សពបុរសរងគ្រោះត្រូវបានក្រុមកា រងារចម្រុះ ប្រគល់ជូនក្រុមគ្រួសារទទួល យកទៅធ្វើបុណ្យតាមប្រពៃណីនៅក្នុងមូលដ្ឋាន៕

អត្ថបទ៖ ឈៀងថារិទ្ធ