ឌុបគ្នាមកលួចទូរស័ព្ទ តែម្ចាស់ឃើញទាន់ស្រែក​ដេញចាប់បានម្នាក់​ ខណៈម្នាក់ទៀតគេចខ្លួន

ជនសង្ស័យម្នាក់ត្រូវបានប្រជាពលរដ្ឋដេញចាប់បានប្រគល់ជូនសមត្ថកិច្ចបន្ទាប់ពីចូលលួចទូរស័ព្ទដល់ក្នុងតូបលក់ដូរ ខណៈម្ចាស់កំពុងរវល់អង្គុយលាងកែវ។

ហេតុការណ៍ខាងលើកើតឡើងកាលពីវេលាម៉ោង៨និង៤៥នាទីព្រឹក ថ្ងៃទី២១ ខែកុម្ភៈ ឆ្នាំ២០២៣ នៅផ្លូវបេតុង ក្រុមទី៦ ផ្សារអូរដឹម ភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។

សមត្ថកិច្ចបានឲ្យដឹងថា ជនសង្ស័យមានឈ្មោះ វណ្ណា ដាវីត ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅភូមិព្រៃព្រីងត្បូង២ សង្កាត់ចោមចៅទី៣។ ចំណែកជនសង្ស័យម្នាក់រត់គេចខ្លួនឈ្មោះ ពៅ ហៅពៀច ភេទប្រុស អាយុអាយុ​២៧​ឆ្នាំ មុខរបរមុនពិតប្រាកដ ស្នាក់នៅភូមិព្រៃព្រីងត្បូង១ សង្កាត់ចោមចៅទី២។ រីឯជនរងគ្រោះឈ្មោះ ចោប កុសល ភេទប្រុស អាយុ២៩ឆ្នាំ មុខរបរលក់ដូរស្នាក់នៅកន្លែងកើតហេតុ មានស្រុកកំណើតនៅភូមិជ្រៃ ឃុំជ្រៃ ស្រុក​មោងឫស្សី ខេត្តបាត់ដំបង ។

បើតាមសម្តីស្ត្រីជាប្រពន្ធរបស់ជនរងគ្រោះបានឲ្យដឹងថា មុនកើតហេតុ ខណៈដែលកំពុងអង្គុយលាងកែវផ្លែឈើភ្លេចខ្លួន ស្រាប់តែជនសង្ស័យម្នាក់ចូលទៅក្នុងតូបលួចយកទូរស័ព្ទដៃម៉ាកសាំសុង ដាក់លើតុក្រោយខ្នង តែពេលជនសង្ស័យរត់ចេញក៏ក្រឡេកឃើញទាន់ ស្រែកផ្អើលអ្នកភូមិជួយដេញចាប់បានម្នាក់តែធ្លាក់ទូរស័ព្ទបែកខ្ទេច ចំណែកបក្ខពួកម្នាក់ទៀត​ជិះម៉ូតូគេចខ្លួនបាត់។

ជនសង្ស័យបានសារភាពថា ខ្លួននិងបក្ខពួកម្នាក់ទៀតពិតជាជិះម៉ូតូទៅចំណុចខាងលើ ឃើញម្ចាស់អង្គុយភ្លេចខ្លួនចូល​លួចទូរស័ព្ទនៅក្រោយខ្នងពិតមែន។ ជនសង្ស័យត្រូវបានប្រគល់ឲ្យសមត្ថកិច្ចនាំយកទៅសាកសួរនៅប៉ុស្តិ៍នគរបាល ដើម្បីកសាងសំណុំរឿងតាមនីតិវិធី៕

អត្ថបទ៖ សុខា