សមត្ថកិច្ចក្រុងតាខ្មៅ ធើ្វការស្រាវជ្រាវឃាត់ខ្លួនជនសង្ស័យពីរនាក់ ធើ្វសកម្មភាពលួចកាត់ខែ្សភ្លើងតាមផ្លូវសាធារណៈយ៉ាងសកម្ម

បន្ទាប់ពីប្រជាពលរដ្ឋរាយការណ៍អំពីករណីលួចកាត់ខែ្សភ្លើងតាមផ្លូវសាធារណះនៅចំណុចភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល ភ្លាមនោះកម្លាំងសមត្ថកិច្ចបានធ្វើការស្រាវជ្រាវឈានដល់ឃាត់ខ្លួនជនសង្ស័យចំនួន២នាក់ បានជាបន្តបន្ទាប់កាលពីថ្ងៃទី១ ខែមេសា ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

 ដោយអនុវត្តតាមបទបញ្ជារបស់ លោកឧត្តមសេនីយ៍ទោ ឈឿន សុចិត្ត ស្នងការ នៃស្នងការដ្ឋាននគរបាលខេត្តកណ្តាល លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានអោយកម្លាំងជំនាញនៃអធិការដ្ឋាននគរបាលក្រុងតាខ្មៅបានធ្វើការស្រាវជ្រាវឃាត់ខ្លួនជនសង្ស័យ២នាក់ ពាក់ព័ន្ធករណី អំពើលួច(កាត់ខ្សែបង្គោលភ្លើង)និងប្រើប្រាស់នូវសារធាតុញៀន ចំណុចផ្លូវក្រវ៉ាត់ក្រុងទី៣ ភូមិទួលក្រសាំង សង្កាត់រកាខ្ពស់ក្រុងតាខ្មៅ ខេត្តកណ្តាល។

ជនសង្ស័យឈ្មោះ ថា ប៊ុននី ហៅឃ្នី ភេទប្រុស អាយុ២៦ឆ្នាំ មុខរបរមិនពិតប្រាកដ មានទីលំនៅសង្កាត់រកាខ្ពស់ ក្រុងតាខ្មៅ ខេត្តកណ្តាល និងម្នាក់ទៀតមានឈ្មោះ ថា វីវះជិប ភេទប្រុស អាយុ៣៩ឆ្នាំ មុខរបរ មិនពិតប្រាកដ អ្នកទាំង២នាក់មានទៅលំនៅដូចគ្នា។ ជនសង្ស័យទាំង២នាក់មានសារធាតុញៀន(+) ផងដែរ។

តាមចម្លើយសារភាពរបស់ជនសង្ស័យខាងលើបានឆ្លើយសារភាពថា ខ្លួនពិតជាបានយកកន្ត្រៃដែកកាត់ខ្សែបង្គោលភ្លើង ហើយយកទៅលក់បានលុយ៤,០០០រៀល ទៅ៥,០០០រៀល យកទៅទិញថ្នាំញៀនយកមកជក់ ប្រាកដមែន។

បច្ចុប្បន្នជនសង្ស័យបានឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងតាខ្មៅ ដើម្បីបញ្ជូនទៅតុលាការចាត់ការតាមច្បាប់៕