សមត្ថកិច្ចខណ្ឌដូនពេញ ឃាត់ម្ចាស់ហាងម៉ាស្សាលួច លុយជនបរទេសចំនួន២ម៉ឺនយ៉េន និងដកហូតប្រាក់ប្រគល់ជូនម្ចាស់ដើមវិញ

ក្រោយទទួលបានពាក្យបណ្ដឹងពីជនរងគ្រោះមានករណីចូលកន្លែងម៉ាស្សារួចបានបាត់លុយក្នុងហាងម៉ាស្សាមួយកន្លែង ស្ថិតតាមបណ្តោយផ្លូវលេខ១៧២ ក្នុងសង្កាត់ជ័យជំនះ ខណ្ឌដូនពេញ នៅវេលាយប់រំលងអាធ្រាត្រឈានចូលថ្ងៃទី២៦ ខែមេសា ឆ្នាំ២០២៦ កម្លាំងជំនាញនៃអធិការដ្ឋាននគរបាលខណ្ឌដូនពេញបានធើ្វការស្រាវជ្រាវ រហូតឈានដល់ការឃាត់ខ្លួនជនសង្ស័យជាម្នាក់ម្ចាស់ទីតាំងហាងម៉ាស្សាពាក់ព័ន្ធសមគំនិតជាមួយបុគ្គលិកស្រ្តី ដោយឡែកចំពោះបុគ្គលិកស្រ្តី២នាក់កំពុងគេចខ្លួន។

គួរបញ្ជាក់ផងដែរថា លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ កាលពីថ្ងៃទី២៦ ខែមេសា ឆ្នាំ២០២៦ បានដាក់បទបញ្ជាទៅកាន់នគរបាលជំនាញ និងអធិការខណ្ឌទាំង១៤ ត្រូវចុះត្រួតពិនិត្យរាល់ទីតាំងអាជីវកម្មម៉ាស្សាទាំងអស់ ករណីរកឃើញទីតាំងនោះមានចេតនាប្រព្រឹត្តិអំពើណាមួយដែលនាំឲ្យមានការបាត់បង់ទ្រព្យសម្បត្តិភ្ញៀវជាតិ ឬអន្តរជាតិ ត្រូវមានវិធានការច្បាប់ជាធរមាន ដោយមិនមានការលើកលែងនោះឡើយ។

រហូតដល់ថ្ងៃទីថ្ងៃទី២៧ខែមេសាឆ្នាំ២០២៦ កម្លាំងសមត្ថកិច្ចជំនាញនៃអធិការដ្ឋាននរគបាលខណ្ឌដូនពេញ បានកំណត់បានមុខសញ្ញាជាម្ចាស់ទីតាំងហាងម៉ាស្សាខាងលើឃាត់យកមកសួរនាំ និងដកហូតលុយដែលបាត់បង់នោះ ប្រគល់ឲ្យជនបរទេសជាជនជាតិជប៉ុននោះវិញ។

បច្ចុប្បន្នសមត្ថកិច្ចជំនាញកំពុងស្រាវជ្រាវបន្តស្វែងរកអ្នកពាក់ព័ន្ធ ដើម្បីយកមកអនុវត្តតាមនីតិវិធី៕