ករណី​ប្តី​ប្រពន្ធ​វ័យ​ចំណាស់​ស្លាប់​ក្នុង​ផ្ទះ បង្កការភ្ញាក់ផ្អើលកាលពីវេលាម៉ោង ១១ និង៣០នាទី នាថ្ងៃទី ០៧ ខែឧសភា ឆ្នាំ​២០២៣ នៅចំណុចទីតាំងផ្ទះរបស់ជនរងគ្រោះស្ថិតក្នុងភូមិកំពង់ពិល ឃុំវត្តតាមិម ស្រុកសង្កែ ខេត្តបាត់ដំបង។

ជុំវិញករណីខាងលើនេះ បើតាម​ប្រភព​ពី​កូនស្រីបង្កើតរបស់ជនរងគ្រោះ ឈ្មោះ ចាន់ ធូ អាយុ ៤២ ឆ្នាំ បាន​ឲ្យ​ដឹង​ថា ក្នុងអំឡុងពេលចូលឆ្នាំកន្លងទៅ ពួកគាត់ជាកូនៗមិនបានមកលេងផ្ទះឪពុកម្តាយទេ ព្រោះតែរវល់ការងាររកស៊ីរៀងៗខ្លួនបែកឆ្ងាយពីពួកគាត់ ហើយគាត់នៅតែពីរនាក់ប្តីប្រពន្ធប៉ុណ្ណោះ ទើបមានហេតុការកើតឡើងពួកកូនៗមិនបានដឹងបែបនេះ​។

ស្រ្តី​ជា​កូន​បន្ត​ថា ស្ត្រីរងគ្រោះជាម្តាយមានជំងឺរ៉ាំរ៉ៃដេកនៅលើគ្រែផង មានតែឪពុក​គាត់នៅ​មើលថែរាល់ថ្ងៃ ហើយពួកគាត់ជាកូនៗបាននាំគ្នាបែកទៅឆ្ងាយរៀងៗខ្លួន ដើម្បីប្រកបរបរចិញ្ចឹមជីវិត។

ស្រ្តី​រូប​នេះបាន​បញ្ជាក់ទៀត​ថា “មុនថ្ងៃកើតហេតុប៉ុន្មានថ្ងៃ ខ្ញុំបានទូរស័ព្ទមកឪពុកម្តាយខ្ញុំដែរ តែទាក់ទងមិនបាន ហើយខ្ញុំក៏ធ្វើហីៗទៅ ដោយមិននឹកស្មានថាមានរឿងនឹងកើតឡើងសោះ។ ពេលខ្ញុំទាក់ទងតាមទូរស័ព្ទមិនចូលលុះព្រឹកឡើងប្អូនប្រុសខ្ញុំមកមើលក៏ស្រាប់តែពួកគាត់ដេកស្លាប់ទាំងពីរនាក់សពឡើងហើមស្អុយបាត់ទៅហើយ ហើយខ្ញុំក៏រាយការណ៍ទៅសមត្ថកិច្ចតែម្តង”។

ជនរងគ្រោះ​ដែល​ស្លាប់​​ដោយ​ប្តី​មាន​ឈ្មោះ សូ សំអឿន ភេទប្រុស អាយុ ៧៦ ឆ្នាំ និងប្រពន្ធឈ្មោះ អិត លឿន អាយុ​៦៦​ ​ឆ្នាំ។ អ្នកទាំង២បានដេក​ស្លាប់ជាមួយគ្នានៅក្នុងផ្ទះ ដោយមិនដឹងមូលហេតុ រហូតសពមានសភាពហើមទើបបង្កការភ្ញាក់ផ្អើលតែម្តង។

ក្រោយកើតហេតុសមត្ថកិច្ចជំនាញនិងក្រុមគ្រូពេទ្យបានចុះទៅពិនិត្យកោសល្យវិច័យ និងស្របតាមការរៀបរាប់របស់កូនៗរបស់ជនរងគ្រោះផង ក្រុមជំនាញនិងគ្រូពេទ្យបានសន្និដ្ឋានថា សាកសពជាប្តីស្លាប់ដោយសារគាំងបេះដូងចំណែកប្រពន្ធដោយសារមានជំងឺរ៉ាំរ៉ៃដេកកន្ទេលដើរទៅណាមិនរួច ដោយប្តីស្លាប់មុនគ្មានអ្នកមើលថែហើយស្របពេលអាកាសធាតុក្តៅ​ផង​នោះ ប្រពន្ធក៏ស្លាប់ទៅតាមក្រោយ ខណះដែលគ្មានអ្នកផ្តល់ទឹកនិងអាហារក៏ដាច់ខ្យល់ស្លាប់តែម្តង៕

អត្ថបទ៖ សៅ សារិទ្ធ