Update៖ ផ្ទះពលរដ្ឋដែលឆេះនៅខណ្ឌដង្កោ ខូច​ខាតទាំងស្រុង

ផ្ទះប្រជាពលរដ្ឋដែលត្រូវអគ្គិភ័យឆាបឆេះយ៉ាងសន្ធោសន្ធៅកាលពីវេលាម៉ោង១៤និង១៥នាទីរសៀល ថ្ងៃទី០៤ ខែសីហានេះ បណ្ដាលឲ្យខូខាតអស់ទាំងស្រុង ខណៈសមត្ថកិច្ចបញ្ជាក់ថា បណ្ដាលមកពីឆ្លងចរន្ដអគ្គិសនី។

សមត្ថកិច្ចបានឱ្យដឹងថា ម្ទាស់ផ្ទះមានឈ្មោះ ដូង សារឿន ភេទស្រី អាយុ៦៧ឆ្នាំ មុខរបរកសិករ មានទីលំនៅក្នុងភូមិទួលសំបូរ សង្កាត់ព្រៃវែង ខណ្ឌដង្កោ រាជធានីភ្នំពេញ (ទីតាំងកើតហេតុ)។

តាមប្រភពព័ត៌មានពីកន្លែងកេីតហេតុបានឱ្យដឹងថា មុនពេលកេីតហេតុគេឃេីញមានផ្សែងពណ៌ខ្មៅហុយចេញពីក្នុងផ្ទះ  និងមានសម្លែងផ្ទុះជាខ្លាំងផងដែរ។ ភ្លាមៗក៏មានអណ្ដាតភ្លេីងឆាបឆេះចេញមកខាងក្រៅជាបណ្ដេីរៗ និងបន្តឆេះឡេីងយ៉ាងសន្ធោសន្ធៅ ខណៈប្រជាពលរដ្ឋរស់ជិតខាងបានរាយការណ៍ទៅអាជ្ញាធរមូលដ្ឋាន និងសុំអន្តរាគមន៍ពីមន្ត្រីជំនាញ​ឱ្យចេញរថយន្តពន្លត់អគ្គិភ័យមកជួយបាញ់ទឹកពន្លត់ ដោយពលរដ្ឋខ្លះក៏បាននាំគ្នាជួយដងទឹកជះពន្លត់ ខ្លះតទុយោទឹកបាញ់ពន្លត់នៅតែមិនអាចគ្រប់គ្រងស្ថានការបាន។

ក្នុងករណីអគ្គិភ័យនេះ កម្លាំងសមត្ថកិច្ចជំនាញបង្ការ និងសង្គ្រោះអគ្គិភ័យបានចេញរថយន្តមកអន្តរាគមន៍តាមបណ្តាអង្គភាពជាច្រេីនគ្រឿង ដោយប្រេីពេលជាងកន្លះម៉ោង និងទឹកចំនួន០៦ឡានក៏រលត់ទៅវិញជាស្ថាពរ។

សមត្ថកិច្ចបានបញ្ចាក់ថា ផ្ទះរងគ្រោះដោយអគ្គិភ័យមានទំហំ ៦គុណ៧ម៉ែត្រ ប្រភេទសំណង់ឈើលើថ្មក្រោមបានរងការខូចខាតទាំងស្រុង តែមិនរាលដាលដល់ផ្ទះអ្នកជិតខាង និងបង្កគ្រោះថ្នាក់ដល់មនុស្សនោះឡេីយ។ ចំពោះមូលហេតុ  បណ្ដាលមកពីឆ្លងចរន្តអគ្គិសនី៕

អត្ថបទ៖ សុខា