ភ្លើងឆេះព្រៃរាលចូលចម្ការដើមម៉ៃសាក់ ស្របពេលអាកាសធាតុឡើងកម្តៅ

អណ្តាតភ្លើងបានឆាបឆេះយ៉ាងសន្ធោសន្ធៅ នៅក្នុងចម្ការដើមម៉ៃសាក់ ប៉ុន្តែត្រូវបានកម្លាំងប្រជាការពារ រួមនឹងសមត្ថកិច្ចចេញជួយពន្លត់បានទាន់ពេលវេលា ស្របពេលដែលរយ:ពេលប៉ុន្មានថ្ងៃនេះ អាកាសធាតុហាក់មានកម្តៅក្តៅខ្លាំង។

ហេតុការណ៍ដែលធ្វើអោយមានការភ្ញាក់ផ្អើលនេះ បានកើតឡើងកាលពីថ្ងៃទី៥ ខែកុម្ភ: ឆ្នាំ២០២៤ វេលាម៉ោង១១និង ១០នាទី នៅចំណុចចម្ការម៉ៃសាក់មួយកន្លែង ក្នុងភូមិសំបួរមាស ឃុំស្នឹង  ស្រុកបាណន់ ខេត្តបាត់ដំបង។

ជុំវិញករណីអគ្គិភ័យឆេះព្រៃដោយមិនដឹងមូលហេតុនេះ គឺបន្ទាប់ពីទទួលបានព័ត៌មានកំលាំងប៉ុស្តិ៍ និងអ្នកស្រីមេឃុំ បានដឹកនាំកម្លាំងប្រជាការពារ និងលោកវរសេនីយ៍ទោ ស សាវឿន ជំនួយការដឹកនាំផ្នែកសណ្ដាប់ធ្នាប់បានដឹកនាំកម្លាំងមួយចំនួន និងរថយន្តអគ្គិភ័យចុះជួយពន្លត់បានទាន់ពេលវេលា ដើម្បីទប់ស្កាត់កុំអោយរាលដាលដល់លំនៅឋានរបស់ប្រជាពលរដ្ឋ ហើយនៅក្នុងករណីខាងលើនេះមិនបណ្តាលអោយគ្រោះថ្នាក់ដល់មនុស្សឡើយ៕

អត្ថបទ៖ សោ និយមរ័ត្ន