បុរសម្នាក់ចូល​ដុតព្រៃក្នុងចម្ការ បែរ​ជា​ស្លាប់ខ្លួនឯងដោយសារថប់ដង្ហើមក្នុងភ្នក់ភ្លើង

បុរសវ័យចំណាស់ម្នាក់បានថប់​ដង្ហើមជាមួយនឹងផ្សែងបណ្ដាលឲ្យដួលស្លាប់នៅក្នុងភ្នក់​ភ្លើង បន្ទាប់ពីបុរសរូបនេះបានចូលទៅដុតព្រៃនៅក្នុងចម្ការរបស់ខ្លួន ហើយទំនងជាឈ្លក់ផ្សែងមិនអាចរត់ទៅណារួច។ នេះបើតាមការសន្និដ្ឋានរបស់សមត្ថកិច្ចជំនាញ។

ហេតុការណ៍ដ៏រន្ធត់នេះបានកើតឡើងនៅថ្ងៃទី ៨ ខែឧសភា ឆ្នាំ២០២៤ វេលាម៉ោង ១ និង ៣០នាទី រសៀល ត្រង់ចំណុច​ភូមិចំការចេក ឃុំស៊ុង ស្រុកសំឡូត ខេត្តបាត់ដំបង ។

បើតាមការរៀបរាប់ពីស្ត្រីដែលជាប្រពន្ធរបស់ជនរងគ្រោះបានបញ្ជាក់ប្រាប់សមត្ថកិច្ចថា នៅមុនពេលកើតហេតុប្ដីរបស់គាត់ឈ្មោះ ស៊ូរ អ៊ុរ អាយុ ៧៧ ឆ្នាំ រស់នៅភូមិស៊ុង ១ ឃុំស៊ុង ស្រុកសំឡូត បានធ្វើដំណើរជាមួយគាត់ទៅកាន់ចម្ការ​ស្វាយចន្ទីដែលពោរពេញដោយព្រៃស៊ុបទ្រុប។

ស្ត្រីជាប្រពន្ធបានបន្តថា នៅពេលនោះប្ដីរបស់គាត់បានចូលទៅដុតព្រៃដែលនៅក្បែរខាងនៃចម្ការ​ស្វាយចន្ទី នៅពេលនោះក៏បាត់ប្ដីរហូតដល់ភ្លើងឆេះព្រៃអស់ ទើបឃើញសពប្ដីដេកស្លាប់ក្នុងភ្នក់ភ្លើងដែលឆេះរោលរាលពេញខ្លួន ទើបមានការភ្ញាក់ផ្អើលនិងរាយការណ៍ទៅសមត្ថកិច្ចដើម្បីចុះពិនិត្យ។

ភ្លាមៗនោះដែរ កំលាំងជំនាញផ្នែកពិនិត្យវិភាគទីកន្លែងកើតហេតុ បានសហការជាមួយកំលាំងជំនាញផ្នែកយុត្តិធម៌និងប៉ុស្តិ៍ស៊ុង បានធ្វើការពិនិត្យទីកន្លែងកើតហេតុ និងសាកសពជនរងគ្រោះ។

សមត្ថកិច្ចបានធ្វើការសន្និដ្ឋានថា តាមការពិនិត្យទីកន្លែងកើតហេតុ ពិនិត្យសាកសព និងបំភ្លឺពីប្រពន្ធ ជនរងគ្រោះស្លាប់ដោយសារថប់ផ្លូវដង្ហើម​មូលហេតុ ដុតព្រៃក្នុងចម្ការ​ស្វាយ​ចន្ទីបណ្តាល​ឲ្យ​រាលឆេះស្លាប់ខ្លួនឯង៕

អត្ថបទ៖ សោ និយមរ័ត្ន