រថយន្តបង្កបើកបុកកូនស្រីស្លាប់ រួចបើកគេច​ខ្លួន​បាត់ គ្រួសារ​ជនរងគ្រោះទាមទាររក​យុត្តិធម៌

ប្រជាពលរដ្ឋមួយគ្រួសារ ដែលមានជីវភាពក្រលំបាក រួមនិងប្រជាពលរដ្ឋជិតខាងជាច្រើននាក់ បានសំណូមពរដល់ក្រសួងយុត្តិធម៌ សាលាដំបូងខេត្តក្រចេះ មានសមត្ថកិច្ចជំនាញពាក់ព័ន្ធ ជួយស្វែងរកយុត្តិធម៌ឲ្យពួកគាត់ ក្រោយរថយន្តបង្កដែលបើកបុកក្មេងស្រីម្នាក់បណ្ដាលឲ្យស្លាប់កាលពីថ្ងៃទី៣ ខែវិច្ឆិកា ឆ្នាំ២០២៤ នៅចំណុចភូមិដីដុះក្រោម ឃុំព្រែកប្រសព្វ ស្រុកប្រសព្វ ខេត្តក្រចេះ ហើយរថយន្តបង្កបានព្យាយាមបើករត់គេចខ្លួនបាត់រហូតមកដល់ថ្ងៃនេះនៅមិនទាន់មានដំណោះស្រាយអ្វីនៅឡើយទេ។

លោក អ៉ិន អង្គារិទ្ឋ (ហៅ កំសត់) ត្រូវជាឪពុកក្មេងស្រីរងគ្រោះ បានរៀបរាប់ថា ក្រុមគ្រួសាររបស់គាត់ នាពេលបច្ចុប្បន្ននេះ កំពុងតែជួបការលំបាកខ្លាំង ត្រូវដើរស៊ីឈ្នួលគេ ដើម្បីរកប្រាក់ចិញ្ចឹមម្ដាយចាស់ និងកូនប្រុសស្រីទាំងពីរនាក់ សូម្បី​តែផ្ទះសម្បែងក៏មិនទាន់មាននៅដែរ។ ឥឡូវនេះ បានបងប្អូនប្រជាពលរដ្ឋជិតខាងឲ្យស្នាក់នៅបណ្ដោះអាសន្ននៅរោងគោ ខាងក្រោយផ្ទះរបស់គេ។

ស្រាប់តែឥឡូវ បែរជាមកជួបរឿងបែបនេះទៀត គឺកូនស្រីរបស់គាត់ស្លាប់ ដោយមិនមានការទទួលខុសត្រូវ ដោយជនបង្កបានបើករថយន្ត គេចបាត់ពីទីតាំងកើតហេតុ រហូតមកដល់ថ្ងៃនេះរយៈពេលជិតមួយខែហើយននៅមិនទាន់មានពន្លឺនិងដំណោះស្រាយអ្វីឡើយ។

ឪពុកក្មេងស្រីរងគ្រោះ បានបន្តថា កូនប្រុសស្រីរបស់គាត់រស់នៅកំព្រាម្ដាយជាង ២ ឆ្នាំមកហើយ ដែលម្ដាយបានរត់តាមគេទៅបាត់ទុកកូនចោលនៅកំព្រា រស់នៅជាមួយជីដូនចាស់ ពឹងលើអ្នកជិតខាង ដែលផ្ដល់កន្លែងរស់នៅនិងផ្ដល់នូវអាហារហូបចុក និងសម្ភារៈ​ឲ្យ​កូនបានចូលរៀនសូត្រនឹងគេ។

ប្រជាពលរដ្ឋ ដែលបានឃើញហេតុការណ៍គ្រោះថ្នាក់ចរាចរណ៍បានឲ្យដឹងថា ករណីគ្រោះថ្នាក់ចរាចរណ៍នេះ ត្រូវបានគេស្គាល់រថយន្ត និងអ្នកបើកបររថយន្តបង្កនោះច្បាស់ បើទោះបីជារថយន្តនោះបានព្យាយាមបើករត់គេចពីទីតាំងកន្លែងកើតហេតុក៏ដោយ។

ពលរដ្ឋបន្តឲ្យដឹងថា អ្នកបើករថយន្តបង្ក ត្រូវបានសមត្ថកិច្ចស្រាវជ្រាវរកឃើញអត្តសញ្ញាណនិងលំនៅឋានរស់នៅស្ថិតក្នុងភូមិថ្មរាប ឃុំព្រែកប្រសព្វ ស្រុកព្រែកប្រសព្វ ខេត្តក្រចេះ។ អ្នកបើករថយន្តឈ្មោះ ឃួន ប៉ាន់ ជិះរថយន្តម៉ាក លុចស៉ីស ៣៣០ ពណ៌ទឹកប្រាក់ ពាក់ស្កាកលេខ ២AJ-7558 បើកបរក្នុងល្បឿនលឿននៅតាមដងផ្លូវជាតិក្នុងមូលដ្ឋានខាងលើ ហើយបានបុកក្មេងស្រីរងគ្រោះពីក្រោយ ខណៈកំពុងតែដើរនៅតាមចិញ្ចើមផ្លូវបណ្តាលឱ្យប្លោងទៅលើរថយន្តនិងស្លាប់ភ្លាមៗនៅកន្លែងកើតហេតុ។

ប្រភពដដែលបានរៀបរាប់បន្ថែមថា ចំពោះឥរិយាបថក្រុមគ្រួសារមួយនេះ គឺស្លូតបូតអ្នកជិតខាងគោរពស្រឡាញ់ បានផ្ដល់នូវម្ហូបអាហារជួយដល់កូនឲ្យបានរៀនសូត្រ ហើយនៅពេលដែលជួបគ្រោះថ្នាក់ចរាចរណ៍នោះ ក្រុមគ្រួសារមួយនេះ មិនមានលទ្ធភាពសូម្បីធ្វើបុណ្យផង តែប្រជាពលរដ្ឋនៅក្នុងមូលដ្ឋានក៏បានជួយជ្រុំជ្រែងយកកូនស្រីនោះទៅធ្វើបុណ្យ តាមប្រពៃណី។

ពួកគាត់ក៏បានស្នើសុំទៅដល់សមត្ថកិច្ចក៏ដូចជាស្ថាប័នតុលាការខេត្តក្រចេះ និងស្ថាប័នពាក់ព័ន្ធទាំងអស់ មេត្តាជួយរកយុត្តិធម៌ ដើម្បីឲ្យជនបង្កចេញមុខមកដោះស្រាយសំណងសម្រាប់ក្រុមគ្រួសារជនរងគ្រោះ ដែលកំពុងតែមានទុក្ខលំបាក នាពេលបច្ចុប្បន្ននេះផង។

លោក តុលា រដ្ឋធានី ស្នងការងនៃស្នងការដ្ឋាននគរបាលខេត្តក្រចេះ បានបញ្ជាក់ថា ចំពោះករណីនេះ លោកបានបញ្ជូនសំណុំរឿងទៅកាន់សាលាដំបូងខេត្តក្រចេះហើយ ដើម្បីសុំគោលការណ៍ស្វែងរកម្ចាស់រថយន្ត យកមកផ្តន្ទាទោសតាមច្បាប់៕
អត្ថបទ៖ ប្រុញ វិធិន