ក្រសួងមហាផ្ទៃផ្អាកការងារលោកវរសេនីយ៍ទោ ពៅ រិទ្ធី ដើម្បីបើកផ្លូវឲ្យតុលាការអនុវត្តច្បាប់

រដ្ឋមន្ត្រីក្រសួងមហាផ្ទៃ លោក ស សុខា នៅថ្ងៃទី២៣ ខែកញ្ញា ឆ្នាំ២០២៥នេះ បានសម្រេចផ្អាកការងារបណ្ដោះអាសន្នចំពោះលោកវរសេនីយ៍ទោ ពៅ រិទ្ធី អត្តលេខ ៥៦០៥០ ដែលមានតួនាទីជាមេបញ្ជាការរង នៃវរសេនាតូចនគរបាលការពារព្រំដែនគោកលេខ៨៩១ ស្នងការដ្ឋាននគរបាលខេត្តបន្ទាយមានជ័យ ដើម្បីបើកផ្លូវឲ្យតុលាការបន្តនិតិវិធីផ្លូវច្បាប់ ពាក់ព័ន្ធករណីនាំទំនិញពីប្រទេសថៃចូលមកកម្ពុជាដោយខុសច្បាប់។

ក្នុងសេចក្ដីសម្រេច លោកវរសេនីយ៍ទោ ពៅ រិទ្ធី ត្រូវមកបង្ហាញមុខរៀងរាល់ម៉ោងធ្វើការនៅការិយាល័យបុគ្គលិក នៃស្នងការដ្ឋាននគរបាលខេត្តបន្ទាយមានជ័យ រហូតដល់មានការសម្រេចជាថ្មី។

សូមជម្រាបថា កាលពីថ្ងៃទី១៨ ខែកញ្ញា ឆ្នាំ២០២៥ កម្លាំងមូលដ្ឋានកងរាជអាវុធហត្ថ​ក្រុងប៉ោយប៉ែត ខេត្តបន្ទាយមានជ័យ សហការជាមួយកម្លាំកងពលតូចថ្មើរជើងលេខ៥១ ចុះ​បង្ក្រាបករណីនាំទំនិញឆ្លងដែនដោយខុសច្បាប់ពីប្រទេសថៃចូលមកកម្ពុជា នៅចំណុចផ្ទះរបស់លោកវរសេនីយ៍ទោ ពៅ វុទ្ធី ជាប់មាត់អូរព្រំដែន ស្ថិតក្នុងភូមិគីឡូលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។

ក្នុងប្រតិបត្តិការចុះបង្ក្រាប កម្លាំងជំនាញបានរកឃើញគ្រឿងក្រអូបចម្រុះ ចំនួន៥៥កេស ទូកស្មាច់ ចំនួន០១ និងរថយន្ត​ចំនួន​ ២គ្រឿង​។

ដោយឡែក​លោកវរសេនីយ៍ទោ​ ពៅ​ វុទ្ធី​ ហៅ​ ធីស្នា​ បាន​រត់គេចខ្លួន​។ ក្រោយពីត្រួតពិនិត្យ វត្ថុតាងទាំងអស់ ត្រូវបានកម្លាំងជំនាញយកទៅរក្សាទុកនៅមូលដ្ឋានកងរាជអាវុធហត្ថក្រុងប៉ោយប៉ែត ដើម្បីអនុវត្តតាមនីតិវិធីច្បាប់៕

អត្ថបទ៖ សុខុម