លោក McConkey ថា ថ្ងៃនេះ ក្រុមលេងតាមផែនការ ប៉ុន្តែមានចំណុចមួយត្រូវកែប្រែ

គ្រូបង្វឹករបស់ក្រុម ព្រះខ័នរាជស្វាយរៀង លោក Matthew McConkey សរសើរកូនក្រុមថ្ងៃនេះលេងតាមផែនការ ដែលបានរៀបចំ ប៉ុន្តែក្រោយការប្រកួត លោកចង់ឱ្យកូនក្រុមកែប្រែចំណុចមួយ ត្រង់ចំណុចចលនារត់ចូលប្រអប់។

ក្រុម ព្រះខ័នរាជស្វាយរៀង ទទួលបាន ៣ ពិន្ទុយ៉ាងសំខាន់ សម្រាប់ការប្រកួតបើកឆាកពូល D នៃពានរង្វាន់ក្លិបអាស៊ីកម្រិតទី ៣ AFC Challenge League ក្រោយការប្រកួតទល់នឹងក្រុម SP Falcons នៅ ពហុកីឡដ្ឋានជាតិមរតកតេជោ ថ្ងៃ អាទិត្យ ទី ២៦ ខែ តុលា ឆ្នាំ ២០២៥។ ពួកគេបានទទួលជ័យជម្នះក្នុងលទ្ធផល ៣ ទល់នឹង ០។ គ្រាប់បាល់ទាំង ៣ គ្រាប់របស់ ព្រះខ័នរាជស្វាយរៀង គឺរកបានដោយ PEPRAH KWAME ២ គ្រាប់ និង TAKASHI ODAWARA ១ គ្រាប់។

ថ្លែងនៅក្នុងសន្និសីទសារព័ត៌មានក្រោយបញ្ចប់ការប្រកួតទល់នឹងក្រុម SP Falcons លោក McConkey បានមានប្រសាសន៍យ៉ាងដូច្នេះ ថា៖ «ការប្រកួតថ្ងៃនេះ មិនមានចំណុចខ្វះខាតអ្វីទេ។ គ្រាន់តែចំណុចមួយចំនួន យើងត្រូវការចំពោះការបញ្ចប់ទី។ គ្រប់ការប្រកួត ដែលយើងលេង គឺភាគច្រើន យើងតែងតែគ្រប់គ្រងបាល់បានច្រើន។ អ្វីដែលសំខាន់ គឺយើងព្យាយាមធ្វើតាមដំណើការ ដែលយើងចាប់ផ្តើមតាំងពី ៤ ខែកន្លងមក។ អ្វីដែលបន្ថែម គឺចលនារត់ទៅក្នុងប្រអប់។ ចំណែកការបញ្ចប់ទី គឺយើងធ្វើអ៊ីចឹងដដែល»។

គួរបញ្ជាក់ថា ការប្រកួតបន្ទាប់ ដែលជាការប្រកួតទី ២ ក្រុមព្រះខ័នរាជស្វាយរៀង នឹងត្រូវជួបគ្នាជាមួយក្រុម Ezra FC នៅថ្ងៃ ពុធ ទី ២៩ ខែ តុលា ឆ្នាំ ២០២៥ នៅ ពហុកីឡដ្ឋានជាតិមរតកតេជោ ដដែល៕

អត្ថបទ៖ សេម កុសល