កីឡា

តើ វិសាខា អាចបញ្ចប់កំណត់ត្រា ភ្នំពេញក្រោន បានទេល្ងាចនេះ?

បានផុស

៧ ថ្ងៃ មុន

នៅ

ថ្ងៃសៅរ៍ ៨ វិច្ឆិកា ២០២៥

ដោយ

ក្រុម វិសាខា ត្រូវបើកទ្វារផ្ទះរបស់ខ្លួនទទួលក្រុមមិនស្គាល់ចាញ់ ភ្នំពេញក្រោន វេលាម៉ោង ៦ ល្ងាច ថ្ងៃសៅរ៍ ទី៨ ខែវិច្ឆិកា ឆ្នាំ ២០២៥ សម្រាប់ការប្រកួតខេមបូឌានព្រីមៀរលីគ សប្តាហ៍ទី១១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិសាខា មិនសូវទទួលបានលទ្ធផលល្អប្រសើរទេនៅរដូវកាលនេះ ដោយឆ្លងកាត់ ៩ ប្រកួត គឺឈ្នះ ២ ស្មើ ៤ និងចាញ់ ៣ រកបាន ១០ ពិន្ទុ កំពុងឈរលេខ ៩ ក្នុងតារាង។ ចំណែកភ្នំពេញក្រោន មិនទាន់ស្គាល់បរាជ័យឡើយ ដោយឈ្នះ ៥ និងស្មើ ២ មាន ១៧ ពិន្ទុ កំពុងឈរលេខ ៣។ ពួកគេជាក្រុមតែមួយគត់ដែលមិនទាន់ស្គាល់រសជាតិចាញ់នៅក្នុងលីគរដូវកាលនេះ។

មិនត្រឹមតែប៉ុណ្ណោះសម្រាប់ការប្រកួតពានអន្តរជាតិ AFC Challenge League ក៏ភ្នំពេញក្រោន មិនទាន់ចាញ់ដែរ។ ការប្រកួតជម្រុះ (Playoff) ពួកគេបានយកឈ្នះក្រុមព្រុយណេ Kasuka យ៉ាងចាស់ដៃ ៦-០ ហើយនៅវគ្គសន្សំពិន្ទុក្នុងពូល ស្មើក្រុម Dewa United ១-១, ឈ្នះ Shan United ៣-១ និងឈ្នះក្រុម Tainan City ៣-២។

ប្រវត្តិជួបគ្នាគ្រប់កម្មវិធីរវាង ភ្នំពេញក្រោន និង វិសាខា គឺ ៣១ លើក ក្នុងនោះ ភ្នំពេញក្រោន ឈ្នះ ១០ លើក វិសាខា ឈ្នះ ៩ លើក និងស្មើគ្នា ១២លើក។ បើនិយាយតែក្នុងលីគធ្លាប់ជួបគ្នា ២១ លើក ដោយ វិសាខា ឈ្នះ ៦ ភ្នំពេញក្រោន ឈ្នះ ៧ និងស្មើគ្នា ៨។

ផ្អែកលើស្ថិតិ ក្រុមទាំងពីរប្រហាក់ប្រហែលគ្នា ប៉ុន្តែអ្វីដែលអ្នកគាំទ្រចាប់អារម្មណ៍បំផុតសម្រាប់ការប្រកួតល្ងាចនេះថា វិសាខា អាចបញ្ចប់កំណត់ត្រាមិនទាន់ចាញ់របស់ ភ្នំពេញក្រោន បានទេ។ ឬមួយ ភ្នំពេញក្រោន រក្សាកំណត់ត្រាបន្តទៀត។