ខ្សែបម្រើ វិសាខា Alisher មានឆន្ទៈលេងឱ្យ​ជម្រើសជាតិ កម្ពុជា ក្រោយទទួលបានសញ្ជាតិខ្មែរ

ខ្សែបម្រើរបស់ក្លិបបាល់ទាត់ វិសាខា Alisher Mirzaev មានឆន្ទៈលេងតំណាងឱ្យជម្រើសជាតិកម្ពុជា បន្ទាប់ពីទទួលបានសញ្ជាតិខ្មែរជាផ្លូវការ។ នេះបើតាមការបញ្ជាក់ដោយលោក ហុក សុចិត្រា អគ្គលេខាធិការក្លិបវិសាខា។

កីឡាករជនជាតិដើម អ៊ុយបេគីស្ថាន Alisher Mirzaev ទទួលបានសញ្ជាតិខ្មែរហើយ ក្រោយគ្រប់លក្ខខណ្ឌលេងនៅក្លិបក្នុងប្រទេស កម្ពុជា លើសរយៈពេល ៥ ឆ្នាំតាមច្បាប់របស់ FIFA កំណត់។ កីឡាករ​បានផ្លាស់មកលេងនៅ កម្ពុជា ដំបូង ដោយចូលរួមជាមួយក្លិប វិសាខា នៅឆ្នាំ ២០១៩។ នៅឆ្នាំ ២០២១ ដល់ ២០២២ កីឡាករបានលេងនៅក្រុម ព្រៃវែង មួយរដូវកាល មុនពេលត្រឡប់មក វិសាខា វិញ ដោយលេងរហូតមកដល់បច្ចុប្បន្ន។

យោងតាមការបញ្ជាក់ដោយលោក ហុក សុចិត្រា ថ្លែងប្រាប់សារព័ត៌មាន «កម្ពុជាថ្មី» គឺសាមីកីឡាករផ្ទាល់មានឆន្ទៈចង់លេងតំណាងឱ្យជម្រើសជាតិ កម្ពុជា នាពេលខាងមុខ។ ប្រសិនបើគ្រូបង្វឹក ក៏ដូចជាក្រុមជម្រើសជាតិទាំងមូលត្រូវការ ហើយក្លិបក៏គាំទ្រក្នុងការឱ្យគេលេងតំណាងឱ្យជម្រើសជាតិ កម្ពុជា ផងដែរ។

ពាក់ព័ន្ធនឹងរឿងខាងលើ លោក ហុក សុចិត្រា បានលើកឡើង ថា៖ «Alisher គាត់គ្រប់លក្ខខណ្ឌហើយ។ ចំណែក រឿងជាប់ជំរើសជាតិ គឺអាស្រ័យលើខាងជម្រើសជាតិ ថាតើគេត្រូវការគាត់ឬអត់។ ក្លិបនឹងគាំទ្រ ប្រសិនជាគាត់ត្រូវបានជ្រើសរើសចូលរួមជាមួយជំរើសជាតិ»។

ភ្ជាប់ជាមួយរឿងខាងលើដដែល «កម្ពុជាថ្មី» បានសង្កត់ធ្ងន់ដោយសួរ ថា តើកីឡាករមានបំណង និងឆន្ទៈចង់លេងតំណាងឱ្យជម្រើសជាតិ កម្ពុជា ឬទេ? លោក ហុក សុចិត្រា បានបញ្ជាក់មកវិញ ថា៖ «បាទ គាត់ចង់លេងតំណាងឱ្យជម្រើសជាតិ កម្ពុជា»។

គួរបញ្ជាក់ ថា ខ្សែបម្រើវ័យ ២៩ ឆ្នាំ Alisher Mirzaev គឺជាកីឡាករបាល់ទាត់ទី ៨ ហើយ ដែលទទួលបានសញ្ជាតិខ្មែរ បន្ទាប់ពីកីឡាករ ព្រះខ័នរាជស្វាយរៀង Yudai Ogawa, កីឡាករ Takaki Ose របស់ BG Pathum, កីឡាករក្រុម Privat Mbarga របស់ Dewa United, កីឡាករក្រុម កងយោធពលខេមរភូមិន្ទ Hikaru Mizuno, កីឡាករក្រុម វិសាខា Faeez Khaan, កីឡាករ Andreas Nieto របស់ក្រុម Bhayangkara FC និង កីឡាករ Abdel Coulibaly របស់ក្រុម អង្គរថាយហ្គើរ៕

អត្ថបទ៖ សេម កុសល