បញ្ជីឈ្មោះជម្រើសជាតិ កម្ពុជា បាត់កីឡាករចូលសញ្ជាតិ និងកីឡាករគួរឱ្យចាប់អារម្មណ៍ច្រើន

សហព័ន្ធបាល់ទាត់កម្ពុជា បានប្រកាសបញ្ជីឈ្មោះកីឡាករ ២៦ នាក់ផ្លូវការ ត្រៀមប្រកួតមិត្តភាពកម្តៅសាច់ដុំទល់នឹងក្រុមជម្រើសជាតិ ប៊ូតាន និង ចិនហុងកុង នាខែ មិថុនា ខាងមុខ ខណៈរឿងដ៏ចាប់អារម្មណ៍ គឺមានកីឡាករចូលសញ្ជាតិ និងកីឡាករកំពុងឡើងជើងមួយចំនួន បានបាត់មុខពីបញ្ជីឈ្មោះ។

ក្រោយបញ្ជីឈ្មោះកីឡាករជម្រើសជាតិ កម្ពុជា ត្រូវបានប្រកាសជាផ្លូវការនៅព្រឹកថ្ងៃ ចន្ទ ទី ២៥ ខែ ឧសភា ឆ្នាំ ២០២៦ នេះ អ្នកគាំទ្របានបង្ហាញការចាប់អារម្មណ៍ជាខ្លាំង ប៉ុន្តែក្នុងពេលជាមួយគ្នានេះ ក៏មានកីឡាករមួយចំនួនត្រូវបានអ្នកគាំទ្រសួររកបន្ទាប់ពីការបាត់មុខផងដែរ។

កីឡាករសំខាន់ ដែលបានអវត្តមានពីបញ្ជីឈ្មោះរបស់លោក Koji Gyotoku រួមមានប្រធានក្រុម សឿយ វិសាល, នីកូឡាស ថេល័រ, តាកាគី អូសិ, កាន់ ម៉ូ, សារ ទី, អ៊ន ចាន់ប៉ូលីន និង លឹម ពិសុទ្ធ ជាដើម។ យ៉ាងណា តាមព័ត៌មានផ្លូវការនៃការអវត្តមានរបស់ នីកូឡាស ថេល័រ, កាន់ ម៉ូ និង តាកាគី អូសិ ដោយសារបញ្ហារបួស។ ចំណែកកីឡាករផ្សេងទៀត ជាការសម្រេចចិត្តរបស់គ្រូបង្វឹក។

គួរបញ្ជាក់ ថា បញ្ជីឈ្មោះកីឡាករទាំង ២៦ នាក់នេះរបស់ កម្ពុជា គឺត្រៀម ដើម្បីប្រកួតមិត្តភាពទល់នឹងក្រុមជម្រើសជាតិ ប៊ូតាន នៅថ្ងៃទី ៤ ខែ មិថុនា និង ចិនហុងកុង នៅថ្ងៃទី ៩ ខែ មិថុនា ឆ្នាំ ២០២៦៕

អត្ថបទ៖ សេម កុសល