អាល្លឺម៉ង់ ជាក្រុមចាញ់នៅវគ្គផ្តាច់ព្រ័ត្រព្រឹត្តិការណ៍ World Cup ច្រើនជាងគេបំផុត

ក្រុមបាល់ទាត់ជម្រើសជាតិ អាល្លឺម៉ង់ បានជាប់ឈ្មោះជាក្រុមឡើងដល់វគ្គផ្តាច់ព្រ័ត្រច្រើនជាងគេ ក្នុងប្រវត្តិសាស្ត្រពានរង្វាន់បាល់ទាត់ជើឯកពិភពលោក (World Cup)។ ជាមួយគ្នានេះ ពួកគេក៏ជាប់ឈ្មោះជាក្រុមចាញ់នៅវគ្គផ្តាច់ព្រ័ត្រ ច្រើនជាងគេបំផុតផងដែរ។

គិតត្រឹមពេលនេះ ក្រុមជម្រើសជាតិ អាល្លឺម៉ង់ បានស្ថិតនៅចំណាត់ថ្នាក់លេខ ២ ជាមួយក្រុមជម្រើសជាតិ អ៉ីតាលី ជាក្រុមឈ្នះពាន World Cup ច្រើនជាងគេ ពោលគឺចំនួន ៤ លើក។ ចំណែកក្រុមជម្រើសជាតិ ប្រេស៊ីល ស្ថិតនៅចំណាត់ថ្នាក់លេខ ១ ដោយឈ្នះច្រើនជាងគេរហូតដល់ទៅ ៥ លើក។

ទោះបីជាយ៉ាងណា ក្រុមបា​នឡើងដល់វគ្គផ្តាច់ព្រ័ត្រពាន World Cup ច្រើនជាងគេ មិនមែនជា ប្រេស៊ីល នោះទេ ប៉ុន្តែជាក្រុមជម្រើសជាតិ អាល្លឺម៉ង់។ ក្រុមរហស្សនាមឥន្ទ្រីដែក អាល្លឺម៉ង់ បានឡើងដល់វគ្គផ្តាច់ព្រ័ត្រចំនួន ៨ លើក ដោយទទួលបានលទ្ធផលជោគជ័យ ៤ លើក និងបរាជ័យ ៤ លើក។

ឆ្នាំដែលពួកគេទទួលបានជើងឯក គឺនៅឆ្នាំ ១៩៥៤ ១៩៧៤ ១៩៩០ និង ២០១៤។ រីឯឆ្នាំ ដែលទទួលបានត្រឹមជើងឯករងវិញ គឺនៅឆ្នាំ ១៩៦៦ ១៩៨២ ១៩៨៦ និង ២០០២។ បញ្ជាក់ផងដែរ ថា នេះគឺជាក្រុម ដែលមានកំណត់ត្រាចាញ់នៅវគ្គផ្តាច់ព្រ័ត្រច្រើនជាងគេបំផុតក្នុងប្រវត្តិសាស្ត្រ World Cup។

ដោយឡែក ក្រុមចាញ់នៅវគ្គផ្តាច់ព្រ័ត្រ World Cup ច្រើនជាងគេលំដាប់ទី ២ មាន ២ ក្រុម គឺ អាហ្សង់ទីន និង ហូល្ល៉ង់ ដែលមានចំនួន ៣ លើកដូចគ្នា។ អាហ្សង់ទីន ធ្លាប់ឡើងដល់វគ្គផ្តាច់ព្រ័ត្រចំនួន ៦ លើក ក្នុងនោះឈ្នះជើងឯក ៣ លើកនៅឆ្នាំ ១៩៧៨ ១៩៨៦ និង ២០២២ និងចាញ់ ៣ លើកនៅឆ្នាំ ១៩៣០ ១៩៩០ និង ២០១៤។ ហូល្ល៉ង់ ធ្លាប់ឡើងដល់វគ្គផ្តាច់ព្រ័ត្រ ៣ លើក ក្នុងនោះចាញ់ទាំង ៣ លើកនៅឆ្នាំ ១៩៧៤ ១៩៧៨ និង ២០១០៕

អត្ថបទ៖ សេម កុសល