កេរ្តិ៍ឈ្មោះលោក Hong ជាវីរបុរសកូរ៉េខាងត្បូងកាលនៅកីឡាករ ប្រែអស់តម្លៃ ត្រឹមពេលធ្វើជាគ្រូបង្វឹក

អតីតគ្រូបង្វឹករបស់ក្រុមជម្រើសជាតិ កូរ៉េខាងត្បូង លោក Hong Myung-bo កំពុងរងសម្ពាធខ្លាំងពីសំណាក់ប្រជាជនកូរ៉េខាងត្បូង បន្ទាប់ពីលោកមិនអាចជួយឱ្យក្រុមរហស្សនាមខ្លាអាស៊ីមួយនេះ ឆ្លងផុតពូលឡើងទៅកាន់វគ្គ ៣២ ក្រុមចុងក្រោយ នៃព្រឹត្តិការណ៍ World Cup 2026 បាន។

ក្រុម កូរ៉េខាងត្បូង បានហាលអាវពី World Cup 2026 យ៉ាងភ្ញាក់ផ្អើល បន្ទាប់ពីទទួលបានលេខ ៣ នៅក្នុងពូល A ក្រោយឆ្លងកាត់ ៣ ប្រកួត ឈ្នះ ១ និងចាញ់ ២ មាន ៣ ពិន្ទុ។ ក្រោយការធ្លាក់ចេញពី World Cup 2026 នេះ គឺបន្ទុកគ្រប់យ៉ាងត្រូវបានធ្លាក់ទៅលើគ្រូបង្វឹកលោក Hong Myung-bo។

លោកបានប្រកាសលាលែងពីតំណែងភ្លាមៗ បន្ទាប់ពីក្រុមទទួលបានដំណឹងអំពីការជ្រុះចេញពី World Cup 2026 មិនដល់ ២៤ ម៉ោងផង។ ទោះបីជាលោកបានលាលែងពីតំណែងហើយក៏ដោយ ក៏សម្ពាធរបស់លោក ក៏ដូចជាសមាគមបាល់ទាត់កូរ៉េខាងត្បូងទាំងមូលមិនទាន់បញ្ចប់ដែរ ក្រោយប្រធានាធិបតី Lee Jae-myung បានបញ្ជាឱ្យក្រសួងវប្បធម៌ កីឡា និងទេសចរណ៍ បើកការស៊ើបអង្កេតអំពីលទ្ធផលដ៏ខកចិត្តនេះ។

លោក Hong កំពុងរងនូវការស្តីបន្ទោសយ៉ាងខ្លាំងពីប្រជាជនកូរ៉េខាងត្បូង ហើយសូម្បីភោជនីយដ្ឋាន​មួយចំនួនក៏បានប្រកាសលែងលក់ជូនលោកទៀតដែរ។ រឿងដែលបារម្ភបំផុត គឺលោកបានទទួលសារគំរាមសម្លាប់ពីជនអនាមិកម្នាក់នៅលើបណ្តាញសង្គម ដែលធ្វើឱ្យសុវត្ថិភាពរបស់លោកពេលនេះ កំពុងស្ថិតក្រោមការការពារយ៉ាងយកចិត្តទុកដាក់បំផុតពី ប៉ូលីស។

កេរ្តិ៍ឈ្មោះជាវីរបុរសរបស់បុរសវ័យ ៥៧ ឆ្នាំរូបនេះកាលនៅជាកីឡាករ បានបំផ្លាញត្រឹមមួយប៉ប្រិចភ្នែក ត្រឹមលោកធ្វើជាគ្រូបង្វឹកនៅ World Cup 2026 នេះ។ កាលនៅជាកីឡាករចន្លោះពីឆ្នាំ ១៩៨៧ ដល់ ២០០៤ លោក Hong ត្រូវបានប្រជាជនកូរ៉េខាងត្បូងចាត់ទុកជាវីរបុរសរបស់ពួកគេ។

អតីតខ្សែការពារកណ្តាលរូបនេះ បានក្លាយជាចំណែកដ៏ធំមួយ ដែលបានជួយឱ្យ កូរ៉េខាងត្បូង ឡើងដល់វគ្គពាក់កណ្តាលផ្តាច់ព្រ័ត្រពាន World Cup 2002។ លោកក៏បានបំបែកកំណត់ត្រាធំ ១ ផងដែរ ដោយបានក្លាយជាកីឡាករអាស៊ីដំបូងគេ ដែលបានបង្ហាញខ្លួនច្រើនជាងគេនៅ World Cup ពោលគឺនៅឆ្នាំ ១៩៩០, ១៩៩៤, ១៩៩៨ និង ២០០២៕

អត្ថបទ៖ សេម កុសល