កីឡា

មេដឹកនាំកូរ៉េខាងត្បូង Lee Jae ស្នើឲ្យស៊ើបអង្កេតពីក្រុមគ្រូបង្វឹកជុំវិញ ជម្រើសជាតិធ្លាក់ពី World Cup លឿន

បានផុស

៣ នាទី មុន

នៅ

ថ្ងៃចន្ទ ២៩ មិថុនា ២០២៦

ដោយ

ប្រធានាធិបតីកូរ៉េខាងត្បូង លោក Lee Jae Myung បានស្តីបន្ទោសក្រុមការងារគ្រូបង្វឹកក្រុមបាល់ទាត់ជម្រើសជាតិរបស់ខ្លួន ជាពិសេសគ្រូបង្វឹកលោក Hong Myung-bo និងស្នើឲ្យក្រសួងធ្វើការស៊ើបអង្កេតជុំវិញការធ្លាក់ចេញពីបាល់ទាត់ពិភពលោកយ៉ាងលឿន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Lee បង្ហោះសារនៅ X កាលពីថ្ងៃអាទិត្យ ទី២៨ ខែមិថុនា ថា ៖«ខ្ញុំមិនត្រឹមតែភ្ញាក់ផ្អើលចំពោះលទ្ធផលលើសពីការរំពឹងទុកប៉ុណ្ណោះទេ ប៉ុន្តែខ្ញុំរឹតតែឆ្ងល់ថែមទៀត»។

«ជាថ្មីម្តងទៀត វាបង្ហាញថា ការសម្រេចចិត្តរបស់ក្រុមគ្រូបង្វឹកគឺជាអ្វីគ្រប់យ៉ាង។ នៅពេលយើងត្រូវប្រៀបធៀបជាមួយពួកគេ គឺយើងត្រូវផ្តោតលើសមត្ថភាពជាចម្បង ប៉ុន្តែបុគ្គលអសមត្ថភាពដែលត្រូវបានជ្រើសរើសជាអ្នកដឹកនាំគឺ លទ្ធផលច្បាស់ដូចថ្ងៃ»។

ក្រុមបាល់ទាត់ជម្រើសជាតិកូរ៉េខាងត្បូង បានធ្លាក់ត្រឹមវគ្គសន្សំពិន្ទុក្នុងពូល A បន្ទាប់ពីបានឈ្នះ សាធារណរដ្ឋឆែក ២-១ រកបាន ៣ ពិន្ទុ ប៉ុន្តែចាញ់ ម៉ិកស៊ិក ១-០ និងចាញ់ អាហ្វ្រិកខាងត្បូង ១-០ ដែលធ្វើឲ្យពួកគេបានធ្លាក់ចេញពី World Cup យ៉ាងលឿន។ សូម្បីតែលេខ ៣ ល្អក្នុងពូលក៏មិនបានផង។

លោក Hong ត្រូវបានតែងតាំងជាគ្រូបង្វឹកជាថ្មីកាលពីឆ្នាំ ២០២៤ ដែលនាំឲ្យមានការមិនពេញចិត្តជាច្រើន និងសារព័ត៌មានកូរ៉េខាងត្បូងក៏បានចុះផ្សាយដោយបានចោទប្រកាន់ពីការតែងតាំងមិនប្រក្រតី។

លោកប្រធានាធិបតី Lee បានលើកឡើងពីការតែងតាំងមិនប្រក្រតីបាននាំឲ្យប៉ះពាល់ដល់ផលប្រយោជន៍សាធារណៈ ហើយផ្តល់ផលប្រយោជន៍ដល់បុគ្គលវិញ។

ញត្តិប្រឆាំងនឹងលោក Hong មួយត្រូវបានចុះផ្សាយនៅវេបសាយរបស់ រដ្ឋសភា កាលពីថ្ងៃព្រហស្បត៍ ភ្លាមៗ បន្ទទាប់ពីទទួលបានការពិនិត្យ ហើយក្រោយមកក៏សាយភាយយ៉ាងខ្លាំង។

លោកប្រធានាធិបតី Lee បាននិយាយថា ៖«ការមិនបានឡើងវគ្គបន្ត ដែលនាំឲ្យសាធារណជនខកចិត្ត បណ្តាលមកពីការតែងតាំងក្រុមការងារនេះឯង។ ខ្ញុំសូមស្នើឲ្យក្រសួងវប្បធម៌ កីឡា និងទេសចរណ៍ ធ្វើការស៊ើបអង្កេតជុំវិញបញ្ហានេះ វាយតម្លៃ និងចាត់វិធានការទប់ស្កាត់ និងកែលំអឡើងវិញ»៕