ព័ត៌មានអន្ដរជាតិ

មនុស្សម្នាក់ស្លាប់ និងម្នាក់ទៀតរបួសធ្ងន់ក្នុងការបាញ់ប្រហារ នៅកន្លែងគាំទ្រព្រឹត្តិការណ៍ FIFA នៅរដ្ឋ California

បានផុស

៣៩ វិនាទី មុន

នៅ

ថ្ងៃចន្ទ ២៩ មិថុនា ២០២៦

ដោយ

មនុស្សម្នាក់ស្លាប់ និងម្នាក់ទៀតរងរបួសធ្ងន់ កាលពីថ្ងៃអាទិត្យក្នុងការបាញ់ប្រហារនៅកន្លែងកម្សាន្តដ៏ពេញនិយមមួយក្នុងទីក្រុង San Jose រដ្ឋ California ដែលកំពុងរៀបចំចាក់បញ្ចាំងការប្រកួតបាល់ទាត់ពិភព លោក នៅកន្លែងអ្នកគាំទ្រ «fan zone»។ នេះបើយោងតាមការលើកឡើងរបស់ប៉ូលិស និងចុះផ្សាយដោយទីភ្នាក់ងារសារព័ត៌មានរ៉យទ័រ នៅថ្ងៃទី២៩ ខែមិថុនា ឆ្នាំ២០២៦ ។

អ្នកគាំទ្របាល់ទាល់នៅរដ្ឋ California ។ រូបភាព ៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើង ពេលមិនមានការប្រកួតបាល់ទាត់ពិភពលោកណាមួយត្រូវបានចាក់បញ្ចាំងនោះទេ ព្រោះមានការប្រកួតតែមួយគត់នៅថ្ងៃនោះ ហើយបានបញ្ចប់នៅម៉ោងប្រហែល ២រសៀល ម៉ោងក្នុងស្រុក។

ប៉ូលិសនៅតំបន់ San Jose លើកឡើងលើបណ្តាញសង្គម X ថា៖ « ជនរងគ្រោះម្នាក់ត្រូវបានប្រកាសថាស្លាប់ នៅនឹងកន្លែងកើតហេតុ។ ជនរងគ្រោះទីពីរត្រូវបានបញ្ជូនទៅមន្ទីរពេទ្យក្នុងស្រុកដោយមានរបួសធ្ងន់ធ្ងរ អាចគ្រោះថ្នាក់ដល់អាយុជីវិត។ ហេតុការណ៍នេះកំពុងត្រូវបានស៊ើបអង្កេតថាជាករណីឃាតកម្ម។ ផ្លូវជុំវិញជាច្រើនត្រូវបានបិទ នៅក្នុងតំបន់នោះ»។

ការបាញ់ប្រហារបានកើតឡើង នៅទីលាន San Pedro ជាកន្លែងមួយក្នុងចំណោមកន្លែងជាច្រើនក្នុងតំបន់ឈូងសមុទ្រ San Francisco ដែលមានមនុស្សយ៉ាងច្រើនបានប្រមូលផ្តុំគ្នាសម្រាប់ពិធីជប់លៀង ចាក់បង្ហាញការប្រកួតបាល់ទាត់ពិភពលោកនៅលើអេក្រង់ធំៗ។

អ្នកកាសែត Reuters ម្នាក់នៅកន្លែងកើតហេតុបានឃើញវត្តមានប៉ូលិស រថយន្តប៉ូលិសជាច្រើនគ្រឿង និងមនុស្សម្នាក់នៅលើរទេះរុញដែលគ្របដណ្ដប់ដោយក្រណាត់ពណ៌សត្រូវបានមនុស្សស្លៀកពាក់ឯកសណ្ឋានប៉ូលិសយកចេញយ៉ាងប្រញាប់ប្រញាល់ចេញពីតំបន់នោះ៕

សម្រួល៖ ណឺ មិនា