កីឡា

ទាំ មករា ឆ្នាំតែមួយ អាចជាប់ជម្រើសជាតិទាំង U-16 និង U-19 កម្ពុជា

បានផុស

២ years មុន

នៅ

ថ្ងៃអង្គារ ២ សីហា ២០២២

ដោយ

សមាជិកនៃក្រុមបាល់ទាត់ជម្រើសជាតិកម្ពុជាអាយុក្រោម ១៦ឆ្នាំ កីឡាករ ទាំ មករា បានសម្ដែងក្ដីមោទនភាព ដោយក្នុងឆ្នាំតែមួយអាចជាប់ជម្រើសជាតិ ២ ឈុត គឺ U-16 និង U-19 កម្ពុជា។

កីឡាករវ័យ ១៦ ឆ្នាំរូបនេះកាលពីខែមិថុនាកន្លងទៅ បានចូលរួមប្រកួតជាមួយក្រុមជម្រើសជាតិអាយុក្រោម ១៩ ឆ្នាំថែមទៀតផង។ យ៉ាងណាមិញ សម្រាប់ការប្រកួតពានរង្វាន់ជើងឯកយុវជនអាយុក្រោម ១៦ ឆ្នាំ (AFF U-16 Boys Championship 2022) ទៅប្រទេសឥណ្ឌូនេ មករា មិនទាន់អាចរួមដំណើរជាមួយក្រុមដោយសារមានបញ្ហារបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាំ មករា បានប្រាប់ ‘កម្ពុជាថ្មី’ ថា៖ «មុនមានបញ្ហារបួស ខ្ញុំរំពឹងថាអាចជួយក្រុមឱ្យឈ្នះ ហើយអាចឡើងទៅវគ្គ ៤ ក្រុមចុងក្រោយ ហើយនឹងយកជ័យជម្នះជូនជាតិមាតុភូមិយើង។ ប៉ុន្តែសោកស្ដាយបន្តិចដោយសារខ្ញុំមានបញ្ហារបួស»។

យុវជនរូបនេះបានរំលឹកថា «ចំពោះអារម្មណ៍ដែលបានចូលលេង U-19 ខ្ញុំមានអារម្មណ៍ថាមិនធ្លាប់មាន ព្រោះអីខ្ញុំធ្លាប់តែលេងតាមលីគ តែនេះយើងលេងតំណាងឱ្យជាតិ អ៊ីចឹងខ្ញុំមានអារម្មណ៍ត្រេកអរខ្លាំងដែលមានឈ្មោះលេងជូនជាតិ»។

មករា បានបន្តថា បទពិសោធទទួលបានលើការប្រកួតប្រជែងលើទីលាន ក៏ដូចជាបទពិសោធរបស់ប្រទេសគេគឺនៅកម្រិតខ្ពស់ និងក្នុងប្រកួតនីមួយៗត្រូវមានការតាំងចិត្តខ្ពស់ និងការត្រៀមខ្លួនទុកជាមុន ដើម្បីយកឈ្នះលើក្រុមគេ។

គួរបញ្ជាក់ថា U-16 កម្ពុជា នឹងចាប់ផ្ដើមប្រកួតដំបូងនៅថ្ងៃទី០២ ខែសីហា ឆ្នាំ២០២២ ដោយនឹងត្រូវជួប U-19 ម៉ាឡេស៊ី។ ប្រកួតទី២ U-16 កម្ពុជា ត្រូវជួប U-16 អូស្ត្រាលី នៅថ្ងៃទី០៥ និងប្រកួតចុងក្រោយថ្ងៃទី០៨ ជួប U-16 មីយ៉ាន់ម៉ា៕

អត្ថបទ៖ មន្នីរ័ត្ន