កីឡា

ថៃ រ៉េត វ៉ៃកីឡាករថៃ វ៉នចក្រឡេក រហូតអាជ្ញាកណ្តាលបញ្ឈប់

បានផុស

២ years មុន

នៅ

ថ្ងៃចន្ទ ១៩ កញ្ញា ២០២២

ដោយ

អ្នកប្រដាល់គុនខ្មែរ ថៃ រ៉េត ទទួលបានជ័យជម្នះក្នុងទឹកទី៤ បន្ទាប់ពីវ៉ៃសន្ធាប់ខ្លាំងលើកីឡាករថៃ វ៉នចក្រឡេក គៀតឆ័ត្រឆ័យ រហូតដល់អាជ្ញាកណ្តាលបញ្ឈប់ក្នុងទឹកទី៤ក្នុងការប្រកួត ប្រដាល់គុនខ្មែរភេសជ្ជៈប៉ូវកម្លាំងខារ៉ាបាវ នៅសង្វៀនបាយ័ន ស្ទឹងមានជ័យ កាលពីថ្ងៃអាទិត្យម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងតំណែងគូឯក ថៃ រ៉េត ដែលមានអ្នកគាំទ្រជាម្ចាស់ស្រុកចូលទស្សនាស្ទើរពេញសង្វៀន បានសម្រុកចូលវ៉ៃឥតប្រណីដៃឡើយក្នុងទឹកទី១ និងទី២។ រូបគេបានព្យាយាមចូលអោបឡើងជង្គង់ និង កែងជាបន្តបន្ទាប់។ យ៉ាងណា កីឡាករថៃ វ៉នចក្រឡេក ព្យាយាមថយក្រោយ និងការពារមែន ប៉ុន្តែរូបគេបានវាយកែងវិញដ៏គ្រោះថ្នាក់ផងដែរ ហើយនៅទឹកទី២ធ្វើឲ្យកីឡាករកម្ពុជារូបនេះហើមក្រោមភ្នែកយ៉ាងធំ។

ចូលទឹកទី៣ អ្នកលេងគុនខ្មែរបានសម្រុកចូលវ៉ៃតាមរយៈការប្រើកណ្តាប់លើក្បាល និងអោបឡើងជង្គង់ជាច្រើន។ ដោយមើលឃើញសកម្មភាពមិនអាចតដៃរួច អាជ្ញាកណ្តាលលោក ធន់ សុភា បានរាប់កីឡាករថៃ៨ម្តងមុនពេលបន្តការប្រកួតរហូតចប់ទឹកទី៣។

ចូលទឹកទី៤ វ៉នចក្រឡេក បានប្រឹងប្រែងជាថ្មីដើម្បីសងសឹកដោយបានព្យាយាមចូលអោប និងឡើងជង្គង់ជាច្រើន ស្របពេល ថៃ រ៉េត ហាក់ទប់សន្សំកម្លាំង។ ក្រោយមកកីឡាករកម្ពុជារូបនេះបានចាប់ផ្តើមសម្រុកសាជាថ្មី និងបានឡើងជង្គង់ផង កណ្តាប់ដៃផង និងកែងផងដែលមើលទៅគ្មានសកម្មភាពតដៃរួចឡើយ។ ទីបំផុតលោកអាជ្ញាកណ្តាលបញ្ឈប់ការប្រកួតក្នុងទឹកទី៤ដើម្បីផ្តល់ជ័យជម្នះទៅកីឡាករ ថៃ រ៉េត៕