កីឡា

ព្រឿង សុជាតិ ផ្ទះដែលជាជំនួយសាងសង់ដោយលោក ពែក មី នោះបានជិតរួចរាល់ហើយ

បានផុស

៣ នាទី មុន

នៅ

ថ្ងៃសុក្រ ១៩ មិថុនា ២០២៦

ដោយ

វីរកងទ័ព និងជាកីឡាករប្រដាល់គុនខ្មែរ ព្រឿង សុជាតិ ថាផ្ទះដែលជាជំនួយរបស់លោក ពែក មី និងសប្បុរសជនរួមគ្នាជួយនោះគឺសាងសង់ជិតរួចរាល់ហើយនៅសល់តែផ្នែកដំបូល និងលាបថ្នាំតែប៉ុណ្ណោះនឹងបញ្ចប់ទាំងស្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីរកងទ័ព ព្រឿង សុជាតិ និងលោក ពែក មី

ព្រឿង សុជាតិ បានឲ្យដឹងថា ផ្ទះដែលជាជំនួយរបស់លោក ពែក មី និងសប្បុរសជនជួយនោះគិតចាប់តាំងពីការសាងសង់មកមានរយៈពេលប្រហែល ២ខែមកហើយ។ ចំពោះការសាងសង់នៅពេលនេះក៏ជិតរួចរាល់ផងដែរ ពោលនៅសល់តែផ្នែកដំបូល និងការលាបថ្នាំតែប៉ុណ្ណោះគឺរួចរាល់ទាំងស្រុងហើយ។

ផ្ទះដែលលោក ពែក មី សាងសង់ជូន ព្រឿង សុជាតិ

វីរកងទ័ពរូបនេះបន្ថែមទៀតថា ផ្នែកខាងដំបូងនេះក៏ទើបតែមានថវិកាបង្គ្រប់ផងដែរដោយលោក ពែក មី បង្ហោះ និងអំពាវនាវរកជំនួយបន្ថែម ព្រោះនៅខ្វះថវិកាបង្ហើយការងារនេះ។ យ៉ាងណាដោយទឹកចិត្តអាណិតស្រឡាញ់ដល់វីរកងទ័ព ព្រឿង សុជាតិ ខាងថ្នាក់ដឹកនាំកម្មវិធីបាល់ទាត់ Soccer League បានឧបត្ថម្ភថវិកា ២០លានរៀលផងដែរដើម្បីបង្គ្រប់ធ្វើដំបូលឈានដល់បញ្ចប់ការសាងសង់ទាំងស្រុងតែម្ដង។ ផ្ទះដែលជាជំនួយពីសប្បុរសជននេះអាចនឹងសាងសង់រួចរាល់នៅអំឡុងខែកក្ដដា ឆ្នាំ២០២៦ នេះហើយ។

ផ្ទះដែលលោក ពែក មី សាងសង់ជូន ព្រឿង សុជាតិ

កងទ័ពការពារទឹកដីរូបនេះ បានថ្លែងអំណរគុណជាខ្លាំងចំពោះទឹកចិត្តលោក ពែក មី ដែលបានយកចិត្តទុកដាក់ និងតាមដានអំពីការសាងសង់នេះជាប់រហូតមកបើទោះជារវល់ការងារប្រចាំថ្ងៃយ៉ាងណាក៏ដោយ។ បន្ថែមពីនេះ ព្រឿង សុជាតិ អរគុណនូវសន្តានចិត្តរបស់លោក ពែក មី និងសប្បុរសជនទាំងអស់ដែលបានជួយជាថវិកាក្នុងការសាងសង់ផ្ទះដល់រូបគេ និងក្រុមគ្រួសារនៅពេលនេះ។

ផ្ទះដែលលោក ពែក មី សាងសង់ជូន ព្រឿង សុជាតិ

បញ្ជាក់ដែរថា ព្រឿង សុជាតិ ជាវីរកងទ័ពនៅប្រចាំឯកងពលតូចលេខ៦ ចំណុះឲ្យកងពលធំអន្តរាគមន៍លេខ២ ក្នុងខេត្តឧត្តរមានជ័យ។ ដោយមើលឃើញពីការលំបាក និងមិនមានផ្ទះសម្បែងសម្រាប់រស់នៅសមរម្យលោក ពែក មី និងសប្បុរជនមួយចំនួនបានចេញមុខអំពាវនាវរកជំនួយដើម្បីសាងសង់ផ្ទះជូនវីរកងទ័ព ព្រឿង សុជាតិ នៅឯខេត្តត្បូងឃ្មុំ។ ផ្ទះដែលកំពុងសាងសង់នេះសរុបថវិកាអស់ប្រហែល ១៤,០០០ដុល្លារអាមេរិក៕

អត្ថបទដោយ៖ នួន ស៊ីណា