ត្រឹម ២ថ្ងៃ គណនីបណ្ដាញសង្គមរបស់ក្លឹប Al Nassr កើនអ្នកតាមដានជិត ៦លាននាក់

គណនីបណ្ដាញសង្គមរបស់ក្លឹប Al Nassr កើនអ្នកតាមដានជិត ៦លាននាក់ ត្រឹមរយៈពេល ២ថ្ងៃ បន្ទាប់ពីតារាបាល់ទាត់ Cristiano Ronaldo ប្រកាសចុះកុងត្រាជាផ្លូវការជាមួយក្លឹបអារ៉ាប៊ីសាអូឌីតមួយនេះ កាលពីថ្ងៃទី៣១ ខែធ្នូ ឆ្នាំ២០២២។

ក្រោយពេលកីឡាករសញ្ជាតិព័រទុយហ្គាល់ Cristiano Ronaldo ចូលលេងឱ្យក្លឹប Al Nassr អ្នកគាំទ្របាល់ទាត់ពិភពលោកបានសម្ដែងនូវក្ដីរំភើបយ៉ាងខ្លាំងជាមួយនឹងព័ត៌មាននេះ ដែលកំពូលអាយដលរបស់ខ្លួនមានទ្រនំជ្រកកោន និងអាចរកចំណូលរហូតដល់ ២០០លានអឺរ៉ូក្នុងមួយឆ្នាំ។

ទន្ទឹមគ្នានេះ អ្នកគាំទ្រសង្កេតឃើញថា បន្ទាប់ពី Ronaldo ប្រកាសចុះកិច្ចសន្យាភ្លាម គណនី Instagram របស់ក្លឹប Al Nassr បានកើន Follower ពី ៨៦០,០០០នាក់ ដល់ជាង ៦.៤លាននាក់ ត្រឹមតែ ២ថ្ងៃប៉ុណ្ណោះ។ តាមការប៉ាន់ស្មាន ចំនួននេះនឹងបន្តកើនឡើងក្នុងប៉ុន្មានថ្ងៃខាងមុខ ដរាបណា CR7 នៅតែបង្ហាញខ្លួនជាសមាជិកក្លឹប Al Nassr។

ក្រៅពីចំនួនអ្នកតាមដានដ៏លើសលប់នៅលើបណ្ដាញសង្គម អាវកីឡាដែលមានលេខ ៧ ដែលជាលេខអាវរបស់ Ronaldo ក៏ត្រូវអ្នកគាំទ្រអារ៉ាប៊ីសាអូឌីតនាំគ្នាសម្រុកទិញអស់ពីស្តុកផងដែរ៕

ប្រែសម្រួល៖ សន្យា

ចុចអាន៖ មកស្គាល់កាន់តែច្បាស់ ពីលីគកំពូលអារ៉ាប៊ីសាអូឌីត ដែល Ronaldo ត្រៀមប្រឡូក