កីឡា

ស្វាគមន៍ គ្រូនាំកម្ពុជាឡើងវគ្គ៤ក្រុមស៊ីហ្គេមដំបូងគេ លោក Félix ក្លាយជាគ្រូកម្ពុជាសាថ្មី

បានផុស

៣ years មុន

នៅ

ថ្ងៃអាទិត្យ ២ មេសា ២០២៣

ដោយ

សហព័ន្ធកីឡាបាល់ទាត់កម្ពុជានៅព្រឹកថ្ងៃទី២ ខែមេសា ឆ្នាំ២០២៣នេះ បានប្រកាសតែងតាំងលោក Félix Dalmás ជាគ្រូបង្គោលរបស់ក្រុមបាល់ទាត់ជម្រើសជាតិកម្ពុជាជាលើកទី២ ដើម្បីដឹកនាំក្រុមកម្ពុជា បន្ទាប់ពីចប់កីឡាស៊ីហ្គេម នាខែឧសភាខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសតែងតាំងលោក Félix Dalmás សាជាថ្មីនេះធ្វើឡើង បន្ទាប់ពីលោក Keisuke Honda សញ្ជាតិជប៉ុនបានប្រកាសចាកចេញពីក្រុមជម្រើសជាតិកម្ពុជា បន្ទាប់ពីចប់ព្រឹត្តិការណ៍កីឡាស៊ីហ្គេម លើកទី៣២ ពីថ្ងៃទី៥ដល់១៧ ខែឧសភា ឆ្នាំ២០២៣។

នេះជាលើកទី២ហើយដែលបុរសសញ្ជាតិអាហ្សង់ទីនចូលដឹកនាំក្រុមជម្រើសជាតិកម្ពុជា បន្ទាប់ពីលើកទី១ លោកបានដឹកនាំពីឆ្នាំ២០១៨ ដល់២០២០ ស្របពេលលោក Honda ជាអ្នកចាត់ការទូទៅ។

លោក Félix Dalmás ជាគ្រូបង្គោលដំបូងគេបង្អស់ដែលបាននាំក្រុម U23 កម្ពុជាឈានឡើងដល់វគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍កីឡាស៊ីហ្គេម កាលពីឆ្នាំ២០១៩។ ពេលនោះ ៤ប្រកួតវគ្គសន្សំក្នុងពូល លោកជួយ U23 កម្ពុជាឈ្នះទីម័រខាងកើត ៥-០, ឈ្នះម៉ាឡេស៊ី ៣-១, ស្មើហ្វីលីពីន ១-១ និងចាញ់ មីយ៉ាន់ម៉ា ២-១ ដើម្បីឈរលេខ២ ក្នុងពូល ឡើងទៅវគ្គពាក់កណ្តាលផ្តាច់ព្រ័ត្រ។ នៅវគ្គពាក់កណ្តាលផ្តាច់ព្រ័ត្រ កម្ពុជា ចាញ់ វៀតណាម ០-៤ មុនពេលប៉េណាល់ទីចាញ់ មីយ៉ាន់ម៉ា ៥-៤ ក្រោយស្មើគ្នា ២-២ ក្នុងការប្រកួតដណ្តើមមេដាយសំរឹទ្ធ៕

អត្ថបទ៖ វីរបុត្រ

Related Topics:ក្រុមបាល់ទាត់ជម្រើសជាតិកម្ពុជា Félix Dalmás